SYUDAD SANG ILOILO (PIA) — Nagpahanumdom ang Iloilo City Health Office sa pag-practice sang maayo nga habits agud makaangkon sang maayo nga batobato ukon kidney, angot sa pagsaulog sang National Kidney Awareness Month.
Base sa impormasyon sang National Kidney and Transplant Institute (NKTI), nagataas ang numero sang gina-dialysis nga pasyente sa pungsod sa 42% gikan sa 25,125 nga datos sang 2022, pakadto sa 35,714 nga datos sang 2023.
Ang pagtaas sang ini nga datos ang nagahatag kabalaka sa mga eksperto sa medikal tuhoy sa mga Pilipino nga gina-dialysis tungod sa pagkaguba sang batobato.
Ginpahayag ni Dr. Rey Isidto, San Isidro Dialysis Center nephrologist, nga kada oras isa ka Pinoy ang gina-diagnose sang chronic kidney disease.
Iya man nga ginpakigbahin nga nagadamo ang mga pasyente nga gina-dialysis sa San Isidro Dialysis Center sa distrito sang Jaro kag East Baluarte Dialysis Center sa Molo.
Ang gilayon nga pagtaas sa numero ang may kaangtanan sa komplikasyon dulot sang diabetes, hypertension, urinary tract infection (UTI), kag iban pa nga mga masakit.
Nalakip man sa rason sang sakit sa batobato ang pag-praktisar sang indi maayo nga lifestyle ukon posible nga impluwensya sang genetics.
Dugang pa, may mga risk factors ang mga indibidwal nga na-diagnose sang chronic kidney diseases, high blood pressure, heart disease, mga nagapanigarilyo, kag ang sobra nga katambukon.
Samtang, mamutikan ang mga renal diseases paagi sa mga laboratory tests kasubong sang urinalysis, creatinine ratio, kag iban pa.
Nagpahinumdom man ang eksperto nga indi na kinahanglan pa nga hulaton ang senyales kag mga simtoma antes magpakonsulta.
Gina-abi abi man ang publiko sa pagsugod sang healthy lifestyle, pagkonsumo sang masustansya nga pagkaon, kag pag-ehersisyo.
Samtang, gin-abisohan ang mga pamatan-on nga magpractice sang balanced kag healthy diet, paglikaw sa panigarilyo kag pag-inom sang makahulubog nga ilimnon, kag pag-untat kaon sang mga pagkaon nga mataas sa asin. Ginahikayat man ang pag-inom sang madamo nga tubig kag regular nga pagpakonsulta. (AAL/LMLE/PIA-ILOILO)
