SYUDAD SANG ILOILO (PIA) – Naglab-ot sa 12 ka mga campus journalists gikan sa senior high school kag kolehiyo sa probinsya sang Iloilo ang ginpasindunggan bilang IWAG awardees sang Philippine Information Agency (PIA) 6.
Ang IWAG Award isa ka tuigan nga pagkilala sa mga campus paper writers nga nagpakita sang huwaran nga performance sa patag sang development communication kag ang kaangot sini nga mga fields, lakip man ang akademya.
Sa bahin sang sekondarya nga lebel, kabahin sa IWAG awardees amo sanday Ellen Faye Yabut sang Philippine Science High School (Banaag publication), Sam Anthony Gobuyan kag Bea Nathalie Golingan sang Pavia National High School (Pavia Gazette).
Samtang, nalakip man sa IWAG awardees sa kolehiyo amo si Danica Mae Hablado sang Central Philippine University (CPU) Central Echo, Ritzdon Hijastro kag Wenvie Claire Aguilar sang Iloilo Science and Technology University (ISATU) Educator’s Gazette, kag Francis Baldemor sang John B. Lacson Foundation Maritime University (JBLFMU) The Dolphin publication.
Kaupod man sa mga awardees sanday Ron Eliezer Duhina kag Richard Olano, Jr. sang Forum-Dimensions, Mark Lawrence Articuna kag Gizelle Amour Tagabi sang Silak Media, kag Therese Mae Dedoroy sang The Lifeline. Ang ini nga mga bumulutho ang nag-gradwar bilang mga editors sa nagkalain lain nga mga college publications sang West Visayas State University (WVSU).
Ginpangunahan ni PIA Director General Jose Torres Jr. kag PIA 6 Regional Head Cheryl Amor ang pagpanghatag sang mga sertipiko kag medalya sa mga campus writers nga kabahin sang ika-47 nga grupo sang IWAG awardees.
Ang ini nga mga student journalists nangin madinalag-on sa pagpanguna sang ila tagsa ka mga editorial team apisar sa mga pagpanghangkat sang panahon.
Sa pihak nga bahin, si Francis Baldemor nga nagserbe bilang Editor-in-Chief sang The Dolphin publication, ang nagpabutyag sang iya kalipay sa patag sang journalism nga ginakabig niya bilang isa ka importante nga aspeto sang iya kabuhi.
“Through this journey, I’ve learned that pursuing your passion with wholehearted dedication—what I call “heartwork”—brings everything into place. Medals and certificates are fleeting, but the true honor lies in the impact you make on your community”, sambit ni Baldemor.
Sa iya nga pagbaton sang IWAG Award, si Baldemor ang naghatag man sang pasidungog sa JBLFMU kag ginkilala ang suporta sang iya mga seniors, mga kaupod sa publication, kag manunudlo sa pagpasanyog sang development communication.
Paagi man sa pinasahi nga eksperyensia, ginpahayag ni Baldemor kun paano ang campus journalism makahatag sang maayo nga epekto bilang isa ka bumulutho sa isa ka maritime nga buluthuan kag paano ini maka-preparar sa pagpanghangkat.
“Onboard a ship, I will be surrounded by crew members of different nationalities and cultures, these lessons in adaptability and effective communication will undoubtedly prove essential,” suno kay Baldemor.
Samtang, ginsambit ni PIA-6 training officer kag deputy regional head Easter Anne Doza ang paglakip sang 50 ka mga IWAG awardees sa ini nga tuig gikan sa mga probinsya sang rehiyon.
“Our IWAG awardees are living testimonials of the DevCom principles and how campus journalism is still relevant up to this day of Artificial Intelligence,” pahayag ni Doza.
Humalin 1977, ang PIA nagatanyag sang IWAG Award sa mga estudyante nga sa karon ang naga-uyat na sang mga matag-as nga mga posisyon sa bahin sang media industry, akademya, gobyerno, ukon pribado nga sektor. (AAL/LMLE/PIA Iloilo)
