SAN JOSE, Antique (PIA) — Nakabaton ang 17 ka mga Agrarian Reform Beneficiary Organizations (ARBOs) kang kapin P4.6 milyones nga balor kang kagamitan sa pagpanguma halin sa Department of Agrarian Reform (DAR).
Kinse ka ARBOs ang nakabaton kang multi-function tiller/cultivator nga naga-balor P298,000 kada unit, samtang darwa duman ka grupo ka mga mangunguma ang nakabaton kang 12-horsepower (HP)-engine nga hand tractor nga may bili P64,500 kada unit.
Ang pagtugro kang nasambit nga mga kagamitan sa pagpanguma napaidalom sa Sustainable and Resilient Agrarian Reform Communities (SuRe ARC) project kang DAR nga tuyo pasanyugon ang sektor kang agrikultura, pahapuson ang pagpanguma paagi sa teknolohiya, kag panginpuslan ang lupa nga halin sa gobyerno.
Sa kabilugan, tuyo kang SuRe ARC project kang DAR nga garantiyahan ang food security sa pungsod.
Sa anang mensahe sa ginhiwat nga turn-over ceremony, ginhambal ni Office of the Provincial Agriculturist (OPA) Officer-in-Charge Gina B. Jordan nga kinahanglan ang moderno nga teknolohoya indi lang sa pagpahapos kang pagpanguma kundi para man magbulos sa nagabuhin nga numero kang mga mangunguma.
Sa anda nga parte, ginsiguro ni DAR-6 Regional Director Shiela B. Enciso nga wara untat ang gobyerno sa pag-ubra kag pagpangita kang paagi para i-tugro ang kinahanglanon kang mga pumuluyo, ilabi ron ang mga mangunguma nga bahul ang parte sa sosyodad.
Gin-agda man ni Enciso ang mga benepisyaryo nga gamiton kang mayad ang mga kagamitan agud mapuslan sa malawig nga panahon.
Sara sa mga benepisyaryo kang proyekto amo ang Sta. Ana-San Joaquin Agrarian Reform Cooperative (SASJARC) nga nakabaton kang multi-function tiller/cultivator para sa andang kalupaan nga ginatamnan kang bugas, mais, kopra kag niyog.
Bahul ang pagpasalamat kang andang chairman nga si Helen Antonio para sa bulig sa andang kooperatiba.
Ginpalab-ot man ni Gov. Rhodora J. Cadiao ang anang pagpasalamat sa DAR kag kay Presidente Ferdinand Marcos, Jr para sa tayuyon nga bulig kag suporta sa mga mangunguma kang Antique.
Masobra 2,600 ka mga agrarian reform beneficiary kag mangunguma halin sa 17 tanan ka mga ARBOs ang makaganar sa mga kagamitan halin sa DAR. (AGP/BPS/PIA Antique)
