Feedback

SYUDAD SANG ROXAS, Capiz, Pebrero 17 (PIA6) – Dungan nga ginkasal pinaagi sa sibil nga seremonya sa kasal ang 64 ka magkahagugma sa banwa sang Ivisan sang Pebrero 14 sa pagpatigayon sang Municipal Civil Registrar kaangut sa Civil Registration Month nga selebrasyon.
 
Ang seremonya nga ginpangunahan ni Mayor Jose Noel N. Yap ang nagatuyo nga maibanan ang mga “anak sa luwas” ukon “illegitimate children” nga problema sang banwa bangud ginalauman nga igaproseso sang mga bag-o lang nakasal ang papeles agud mangin legal na sila nga ginikanan sang ila mga kabataan.
 
Ginpahayag ni Mercy Valgomera nga Municipal Civil Registrar kag Public Information Officer sang Ivisan nga ginsundan sang salo-salo ang seremonya nga gintambongan man sang mga lokal nga opisyal sang banwa subongman kabaranggayan, mga himata sang nagpakasal kag madamu nga iban pa.
 
Nahibaluan nga 62 anyos ang pinakatigulang nga lalaki ang nagpakasal sa iya 57 anyos nga kahagugma nga nagin iloy na sang ila pito ka mga kabataan humalin sang ila pag-upod sang tuig 1975.
 
Ang kapareho nga seremonya ang ginpatigayon man sang lokal nga panguluhan sang Mayo 2015. (JCM/AAL/PIA6 Capiz)