SYUDAD SANG ROXAS, Capiz, Marso 17 (PIA6) – Naglab-ot sa 3,355 ka mga reklamo sang bumalakal ang na-resolba pinaagi sa Consumer Welfare Desks (CWD) nga gintukod sang Department of Trade and Industry (DTI) Provincial Office sa nagkalainlain nga mga establisemento komersiyal sa probinsya.
 
Ginpahayag ni Merian Asas nga Public Information Officer sang DTI Provincial Office nga ang mga reklamo nga na-resolba sang mga CWD ang ginalakipan sang mga warranty subongman pagbaylo sang sizes ukon kolor sang produkto.
 
Samtang gindugang pa ni Asas nga ang iban nga mga bumalakal ang naga-diretso sang ila mga reklamo sa DTI Provincial Office para sa nagakaigo nga bulig ukon solusyon.
 
Nahibaluan nga 50 na ka mga CWD nga ginadumalahan sang mga nahanas sa pagdumala sang reklamo nga mga empleyado sang establisemento ang natukod sang DTI sa probinsya base sa Disyembre 31, 2016 nga rekord sang talatapan.
 
 Sa iya nga bahin, ginpahayag ni Ermelinda Pollentes nga hepe sang DTI Provincial Office nga ang CWD ang isa ka pamaagi agud nga mapaayo sang mga establisemento komersiyal ang ila tagsa ka mga imahe agud mapataas ang ila kita bangud ang mga kustomer nga kuntento sa ila “after-sales” nga suporta ang mahimo magbalik sa ila balaligyaan agud liwat magpamakal.
 
Ginapahanumdom man ni Pollentes sa tanan nga bumalakal nga idangop sa gilayon sa CWD ang balaligyaan sa ti-on nga matalupangdan nga may depekto ang nabakal nga produkto. (JCM/AAL/PIA6 Capiz)