TAGBILARAN CITY, March 14 (PIA)--Gibarogan sa Department of Labor and Employment (DOLE) nga dili makadawat og bisan unsang benepisyo ang mga trabahanteng mapamatud-ang naangol, nabaldado o nagsakit tungod sa paggamit og ginadili nga droga.

Gipahayag ni DOLE Kalihim Silveste Bello III nga ang polisiya sa ilang buhatan ug sa Employees’ Compensation Commission (ECC), kauban ang Regional Extension Units (REUs) niini, agi og pagsunod sa tinguha ni Presidente Rodrigo Duterte nga taposon ang paggamit sa ilegal nga droga.

Gipasabot ni Bello nga ubos sa kasamtangang kamanduan ug regulasyon sa DOLE-ECC,  ang pagka-angol, pagkabaldado ug pagkasakit nga may kalabotan sa pagtrabaho lamang ang mahimong mahatagan og benepisyo.

Matud pa nga dili sila bayran kun kini tungod sa pag-inom og mga ilimnong makahubog o paggamit og ilegal nga droga.

Ubos sa Employees Compensation Program, ang pagkahubog nitumbok sa kondisyon sa usa  ka trabahante nga naa sa impluwensiya sa ilimnong makahubog o sa ginadili  nga droga nga magdala og dili maayong epekto sa iyang paglihok, pagsulti, pamatasan o panghuna-huna nga mahimong hinungdan aron dili niya mabuhat og maayo ang iyang katungdanan sa trabaho.

Samtang matud pa ni ECC Executive Director Stella Zipangan-Banawis nga hugot nga ginapatuman sa ECC ang occupational safety and health standards isip nag-unang proteksiyon aron malikayan ang aksidente sa mga lugar-trabahuan. (ecb/PIA7-Bohol)