TAGBILARAN CITY, March 17 (PIA)--Gilusad sa Philippine Information Agency (PIA) Bohol Information Office ang duha ka information kiosks alang sa Association of Southeast Asian Nations (ASEAN) karong adlawa, Marso 16, 2017.

Unang gilusad ang PIA information kiosk sa Tagbilaran City Airport Departure Lounge, ning syudad sa alas 7 sabuntag.

Gipangunahan kini ni PIA-Bohol Manager Rey Anthony Chiu kauban silaVioleto Sarmiento, representante ni Civil Aviation Authority of the Philippines (CAAP) Manager Dennis Aures, Fiel Angelie Araoarao Gabin nga representante ni Tagbilaran City Mayor John Geesnell Baba’ Yap II, Emmylou Palacio Noel sa Provincial Tourism Council ug Gob. Edgar Chatto.

Si Chatto nga lulan sa unang flight sa Cebu Pacific gikan sa kaulohan maoy nanguna sa ceremonial ribbon cutting sa PIA information kiosk.

Human niini, gisunod dayon ang pagbukas usab sa laing PIA information kiosk sa Philippine Ports Authority (PPA) Admin. Building Multi-Purpose Hall sa alas 10 sabuntag.

Gipangunahan kini ni Chiu inubanan sa mga pinasidunggang dinapit nga sila Tagbilaran City Port Manager James Gantalao, Bohol Tourism Officer Josephine Cabarrus, Jaypee Orcullo sa Department of Tourism, Tagbilaran City Tourism Officer Shebel Ligalig ug Bohol Administrator Ae Damalerio.

Makita sa maong PIA information kiosks ang audio visual presentations ug IEC materials kalabot sa ASEAN ug ubang programa ug proyekto sa gobyerno. 

Gilusad sa PIA ang mga information kiosk sa nagkalain-laing dapit sa nasod aron mapahatod sa publiko ang mga impormasyon kalabot sa ASEAN, ilabi na ang kamahinungdanon niini ug ang mga benebisyong makuha samatag Pilipino niini.

Gipangunahan sa PIA ang Media Affairs committee alang sa preparasyon sa ASEAN kauban ang EDCOM ug Bohol Tri-Media diin ang Bohol usa sa host nga lalawigan sa ASEAN 2017.(ecb/PIA7-Bohol)