TAGBILARAN CITY, March 17 (PIA)--Magtukod ang Malakanyang og anti-graft unit nga motutok sa mga reklamo nga gisang-at batok sa mga opisyal sa gobyerno nga naa sa executive branch.

Matud pa ni Cabinet Secretary Leoncio Evasco, imbestigahan sa maong anti-graft unit ang mga reklamo nga may kalabotan sa korapsiyon nga gisang-at sa Presidential Action Center.

Pasabot pa ni Evasco, gitukod ang anti-graft unit human niduso og reklamo ang mga empleyado sa Tourism Promotions Board batok sa ilang Chief Operating Officer nga si Cesar Montano tungod sa mga anomaliya ug iregularidad.

Apan matud pa ni Evasco, dili lang ang kaso ni Montano ang imbestigahan sa anti-graft unit apan apil usab ang uban pang opisyal sa executive department.

Kahinumdoman nga una nang miingon si Presidente Rodrigo Duterte nga padayon pa gihapon niyang gisaligan si Montano bisan sa gipasang-at nga reklamo batok sa opisyal. (ecb/PIA7-Bohol)