QUEZON CITY, March 20 – Tungod nga an rabies nagpapadayon nga problema san panlawas sa Pilipinas, an Department of the Interior and Local Government (DILG) nananawagan san mga local chief executives (LCEs) nga suportaran an pag selebrar san Rabies Awareness Month nga yaun tema: Rabies, Iwasan, Alaga’y Pabakunahan.”

Dida san direktiba, si DILG Secretary Ismael D. Sueno nag aaghat san mga namumuno san local nga pangobyernohan nga pakiwahon an tagsa nga Provincial Veterinary Offices ngan Municipal Agriculture Offices pag suporta san mga buruhaton pinaagi san pag implementar san mga pitad pag-iwas ngan  pagwara san rabies.

Gin aaghat ni Sueno an mga gobernador ngan  mga mayors nga maghimo sin mga aktibidades para mapadukwag an kahibabruan matungod san pag likay san rabies ngan responsabli nga pagtagyaun ayam o iding.

Paseguruhon san mga mayors nga an ngatanan nga ayam nga ada sa poder san bungto in rehistrado ngan an pinaka importante gin bakunahan, sugad ni Sueno.

An mga buruhaton san bungto, mao an pagbitay sin streamers, poster ngan iba pa nga information materials sa mga tawohon nga lugar ngan mag organisar sin training matungod san adbokasiya pagpasabot matungod sa rabies.

Ginmandoan liwat ni  Sueno an ngatanan nga Regional Directors ngan Field Officers  para mapahaluag an pagpadukwag san impormasyon san nasabi nga direktiba san ngatanan nga Local Government Units.

Subay san DOH, an rabies in sayo nga human infection nga natatabo katapos makagat, o makamrot san sayo nga infected nga hayop sugad san ayam o iding. Puede ini tumapon kon an laway  direkta nga makontak san biktima o san abrido nga samad.  

Base san data san DOH, an rabies in sayo nga ginpapabay-an nga sakit, kon diin syento por syento nakakamatay pero syento por syento puyde liwat malikyan. Diri ini nangunguna nga kawsa san kamatay ngan san sakit sa nasud pero ginkikit-an nga sayo nga dako nga problema san panlawas tungod kay sayo ini san nakamamatay nga infection ngan responsabli san kamatay sin maabot 200 abot 300 nga Filipino kada tuig. (DILG- Translated by  A. Diaz/PIA-Northern Samar)