MAASIN CITY, Southern Leyte April 20 (PIA) - Gikan sa pagpatuman og usab sa kampanya batok sa paglaganap sa illegal nga druga sa Southern Leyte ubos sa Double Barrel- Reloaded sa bulan sa Marso, duha na ka High Value Targets, pulos mga residente sa Maasin City ang nadakpan, mao kini ang pahayag ni PNP Provincial Director Police Senior Supt Warren de Leon dili pa lang dugay.

Kalabot niini, nakadakop usab ang kapolisan og 5 ka street level targets gikan sa nagkadaiyang mga lungsod sa Southern Leyte.

Dugang niyang pahayag nga adunay pay unom ka mga High Value Targets ang ilang gi-under surveillance, hinoon ang uban niini mi-ikyas na gawas sa probinsiya, apan ubos gihapon sa ilang surveillance nga listahan og mahimo usab nila nga pag-pakig koordinasyon sa ubang nga police stations sa ubang mga dapit.

Samtang, mokabat na og 9,118 ka mga surrenderers ang natala sa Southern Leyte gikan sa Hulyo 1 hangtud sa kasamtangan. Diin 80 kanila misurrender ubos sa DB Reloaded kon gikan sa Marso 1 hangtud sa kasamtangan, sumala kang PD De Leon. (ajc/esg/PIA8-So.Leyte)