CAGAYAN DE ORO CITY, March 17 -- Gisuportahan sa  konseho sa syudad ni bise mayor Kikang Uy ang sugyot ni konsehal Leon Gan, chairman sa komite sa senior citizens, ang paghangyo og pundo sa presidente sa  nasud aron magamit sa himoong profiling sa mga nagpuyo sa danger zone areas dinhi sa syudad.

Atol sa regular session sa konseho niadtong Lunes nga gidumala ni bise mayor Kikang Uy, matud ni Gan nga hangyoon ang presidente sa maong kantidad nga P50 milyones alang sa nasangpit nga katuyuan.

Gidugang ni Gan nga nakatambong siya sa panagtigom sa Presidential Commission on Urban Poor uban ni Secretary Leoniso Evasco nga dinhi gipahigayon sa syudad ug giasoy sa kalihim nga nahimo na kini nga hangyo sa ubang mga syudad sa nasud.

Sa pamasin nga magahinan ang atong syudad kay daghan pa kaayo ang katawhan nga wala marelokar ug ang uban gani anaa pa nanimuyo sa mga delikado nga dapit sama sa daplin sa creek.

Sa akong pakisusi mokabat sa 12 mil ka pamilya ang anaa nagpuyo sa danger zones ug nagkinahanglan  kita sa dili mominus 5 mil  ka mga balay alang kanila samtang 722 lang ang bakante nga pwedeng mabalhinan, pamahayag ni Gan.

Nunot niini, ang konseho misagop sa Resolosyon No. 12647-2017 nga naghangyo sa presidente paggahin og P100 milyones aron magamit pagtukod og housing units sa mga molopyo sa dakbayan nga nanimuyo sa mga delikadong lugar. (El Kapitan/SP)