SIYUDAD SANG ILOILO, Abril 22 (PIA6) - - Gina-implementar na sa karon sang Department of Social Welfare and Development (DSWD) katuwang ang Western Visayas Medical Center (WVMC) ang Libreng Gamot Para sa Masa (Lingap sa Masa).

Ang Lingap sa Masa, libre nga medicine program ni Presidente Rodrigo Duterte nagikan sa Presidential Social Fund.  

Suno sa DSWD 6 sa idalom sang programa, mahimo mahatagan sang bulig para sa bulong ang mga pasyente sa WVMC.

Ginapanugyan sa mga pasyente nga na-admit sa WVMC nga magkadto lang sa talatapan sang DSWD nga yara sa ospital mismo dala ang reseta, medical abstract, certificate of indigency kag valid ID. Sa mga malayo ang lugar nga ginhalinan, mahimo magkuha sang Certificate of Indigency sa Social Services Office.

Sa mga out-patient naman, dal-on lamang ang reseta, medical abstract, certificate of indigency kag valid ID. Kung malayo man ang lugar nga ginhalinan, mahimo man kuhaon ang Certificate of Indigency sa Social Services Office.

Matapos mahinun-anon sang social worker, gilayon nga ginahatagan sang Guarantee Letter para makakuha sang bulong sa botika sang ospital.

Sa dugang nga kasayuran natuhoy sa programa, pangitaon lang si Corazon Cabrera, personnel sang DSWD ukon magtawag sa (033) 503-3797 ukon (033) – 337-6221. (DSWD6/JCM/laf/PIA6-Iloilo)