SYUDAD SANG ROXAS, Capiz, Marso 20 (PIA) – Kompyansa ang National Food Authority nga malab-ot nila sa pagpamakal ang 144 mil ka sako sang humay sini nga tuig.

Ginpahayag ni Mary Christie Harion, tagpamaba sang National Food Authority diri sa Capiz nga labi nila nga ginapasangkad ang ila operasyon sa pagpamakag sang humay pinaagi sa pagpahamtang sang mobile procurement team.

Ini maluwas sa ginadala sang mga mangungoma nga mga ginabaligya nga humay sa bodega sang NFA ilabi na sa Bolo, Roxas City, Sigma kag sa Dumalag.

Naglab-ot naman sa 10,613 ka sako sang humay ang nabakal sang NFA humalin sang bulan sang Enero tubtob Pebrero sini nga tuig.

Suno man kay Harion nga  sa sining summer crop season, magabaton man sa pagbakal ang ila talatapan sang humay nga may ara nga 18-porsyento nga moisture content agud maakomodar ang patubas sang mga mangungoma.

Mahibaluan nga sang nagligad nga tuig, naglab-ot sa 89,898 ka sako sang humay ang napamakal sang NFA, nga mas mataas sang kapin 163-poryento ikompara sa ila target nga balaklon nga humay.

Sa gihapon, ang NFA ang nagabakal sang matinlo kag uga nga humay sang P17 tagsa ka kilo maluwas sa dugang nga mga insentibo sa mangungoma ukon kooperatiba, nga mas mataas naman kay sa pagpamakal sang mga pribado nga negosyante.(JCM/JBG/PIA6-Capiz)