Cebuano news: PNoy, mipasalig nga mapasug-an ang 36,000 ka sitios sa dili pa mag-2016

By Elvira C. Bongosia

Friday 3rd of August 2012

TAGBILARAN CITY, Bohol, Aug 3 (PIA) -- Giseguro ni Presidente Benigno Aquino III nga mapasug-an na ang tibuok 36,000 ka sitio sa nasud nga walay kuryente sa dili pa matapos ang iyang termino sa 2016.

Sa pagtambong niya sa ika-33 nga Annual Assembly sa Philippine Rural Electric Cooperatives Association, Inc. (Philreca) sa Philippine Trade Training Center sa syudad sa Pasay, gipasigarbo ni PNoy nga sulod sa iyang duha ka tuig nga pangatungdanan, napasug-an na niya ang 2,400 ka sitio sa tibuok nasud.

Giingong target niyang mapasug-an ang 6,700 ka sitio sa dili pa matapos ang 2012.

Sa iyang pahayag, gipasalamatan sa Presidente si Energy Secretary Rene Almendras ug ang mga electric cooperative sa mga lakang niini aron mapahatud ang kuryente sa pinakasuok nga dapit sa nasud.

Naglaum usab ang Presidente nga mapalabang na ang National Electrification Administration Reform Bill nga nagtinguhang hingusgan pa ang National Electrification Administration (NEA) charter ug malikayan ang pulitika sa mga electric cooperative. (MBCN/ECB-PIA7 Bohol)