Waray news: Disaster council han Sinirangan Bisayas nag-oobserbar han disaster consciousness month

By Marivic A. Alcover

Thursday 5th of July 2012

TACLOBAN CITY, Leyte, Hulyo 5 (PIA) -- An Regional Disaster Risk Reduction and Management Council (RDRRMC) han Sinirangan Bisayas an nangungulo han paglunsad han National Disaster Consciousness Month nga selebrasyon, han Lunes, didto ha Robinson’s Place Activity Area.

An usa ka-bulan nga pag-obserbar nga may tema nga “Ligtas na Bayan, Maunlad na Pamayanan” (Safe town, prosperous community), in pagtitikangan pinaagi hin usa nga motorcade nga papartisiparan han mga meyembro nga ahensya han RDRRMC.

Hi Colonel Virgilio Espineli, an Assistant Commanding Officer han 8th Infantry Division, an panguna nga nagyakan, in nanawagan hin pagka-urosa ngan kuoperasyon han ngatanan nga mga stakeholder han rehiyon para magkaada hin kamurayawan ngan harayo ha kadelikaduhan nga kumunidad.

An militar in pirmi aada para bumaton han mga panginahanglan ha oras hin may mga kalamidad, ngan an mga ahensya han gobyerno in pirmi aada para bumulig pero ginklaro niya nga para magka-ada hin talwas nga kumunidad, an tagsa-tagsa nga meyembro han kumunidad in kinahanglan nga magdumara han iya parti ha pagpreparar para hin kalamidad.

An paglunsad nga aktibidad in gintagan hin kolor pinaagi hin usa nga photo exhibit han iba-iba nga mga inisyatiba pagpadalagan ha oras hin kalamidad ngan mga proyekto han RDRRMC Sinirangan Bisayas.

An paglunsad nga programa in nagpakita gihapon han mga nahimo han RDRRMC ha ilarum han iya upat nga mga sub-committees nga amo an kapreparado, pagpauro-upay ngan paghirot, pagbaton ngan pagpauro-upay ngan rehabilitasyon.

An Department of Interior and Local Government nga amo an namumuno han subcommittee on preparedness in ginrepresentaran ni Atty. Arnel Agabe, an assistant regional director. Ginduon ni Agabe nga an mga lokal nga pangobyernohan an kinahanglan nga mamuno han pagpasarang ha publiko parti han pagigin andam ha oras hin kalamidad ha ira tagsa-tagsa nga mga lugar.

“We do not want the Ormoc flood and Guinsaugon landslide to happen again. LGUs must undertake disaster risk reduction and management measures to prevent huge effects of natural disasters,” sering ni Agabe.

Hi Department of Science and Technology Region 8 Director Edgardo Esperancilla in naghimangraw parti han paghirot ngan paglikay nga mga pitad nga iginpapakilala ngan iginpapahamtang han DOST ngadto han iba-iba nga mga bungto han nasud. Ginpasabot gihapon niya an publiko parti han iglulunsad nga NOAH nga proyekto han DOST. (EOPT/Trans. by MAA-PIA8)