Waray news: DOH pinangungundahan selebrasyon han Nat’l Blood Donation Month

By Marivic A. Alcover

Monday 9th of July 2012

TACLOBAN CITY, Leyte, Hulyo 9 (PIA) -- Pangungundahan han Department of Health an komemorasyon han National Blood Donation Month ha Sinirangan Bisayas pinaagi han pagdumara hin pipira nga mga aktibidad paghatag hin duon han iya importansya.

Hi DOH Rehiyon 8 Director Jaime S. Bernadas in nagsering nga an bulan han Hulyo in gindesignar nga National Blood Donor’s Month pinaagi han Presidential Proclamation No. 1021, petsado Hulyo 9, 1997.

An panuyo han pag-obserbar pagpasarang han impormasyon ha publiko han panginahanglan hin de kalidad ngan talwas nga dugo, amo an paghatag hin honor ngan rekognasyon han mga nagdonar han dugo, ngan pag-aghat hin regular nga pagdonar hin dugo, sering ni Bernada.

Upod dida han mga aktibidad han usa ka-bulan nga selebrasyon amo an motorcade, usa nga symposium ngan usa nga press conference katapos han motorcade nga pagdudumaraon ha Hulyo 9.

An motorcade in magtitikang ha alas’8 han aga ha may Balyuan Convention Center ngan an symposium para han bulontaryo nga pagdonar hin dugo in pagdudumaraon ha Balyuan Convention Center katapos han motorcade.

An Republic Act No. 7719, nga kilala gihapon bali National Blood Services Act han 1994, in nagpapasarang hin buluntaryo nga pagdonar hin dugo para magkaada hin supisyente nga suplay hin masasarigan nga dugo ngan para magin regular na an mga bangko han dugo. An panuyo hini nga balaudnon amo amo pagpahibaro han publiko nga an pagdonar hin dugo in usa nga makatawo nga burohaton.

An National Voluntary Blood Services Program (NVBSP) han Department of Health in nagtatarget han mga batan-on nga magin buluntaryo ha iya pagdonar hin dugo nga programa. Ha pagsunod han RA No. 7719, an panuyo amo an pagpasarang han kinaadman han importansya han pagdonar hin dugo pagsalbar han mga kinabuhi han milyones nga mga Pilipino.

Basi ha impormasyon tikang ha National Voluntary Blood Services Program, umabot hin 654,763 nga mga blood unit in nakulekta dida han 2009. Singkwenta-eotso in tikang ha mga boluntaryo nga nagdonar hin dugo ngan an nahibibilin in tikang han pagliwan nga donasyon.

Nagsering hi Bernadas nga an DOH in nagdadahum nga damo nga mga indibidwal in magigin regular nga bulantaryo nga waray bayad nga mga magdodonar hin dugo para makaseguro hin supisyento nga suplay hin protektado nga dugo ngan para matapo nga panginahanglan han dugo. (Trans. by MAA/PIA-8)