Waray news: Igindasig han Malacañang an hitaas nga GDP dida han siyahan nga kuwarter han 2012 nga pinakahitaas nga growth rate ha bug-os nga rehiyon han ASEAN

By Daniel U. Mausisa

Saturday 2nd of June 2012

MANILA, Hunyo 2 (PIA) -– Ginpahayag han Malacañang an mahinungdanon nga paglambo han ekonomiya han nasud nga resulta han padayon nga kompiyansa han pribado nga sektor dida hiton administrasyon ni Pangulo Aquino, lakip na an paghitaas han eksportasyon ngan an darudamo na nga salapi nga gin-gagastos han katawhan Pilipino.

Dida han regular nga press briefing ha Malacañang hadton Huebes, ginbasa ni Deputy Presidential Spokesperson Abigail Valte en usa nga pahayag bahin han paglambo han kanan nasud Gross Domestic Product (GDP) dida han siyahan nga kuwarter han 2012 nga, sering niya, amo an pinakadako nga pagtubo hin GDP ha bug-os nga rehiyon han Association of Southeast Asian Nations (ASEAN).

Inursa daw an ekonomiya hin 6.4 porsyento para han siyahan nga kuwarter o tulo ka bulan han 2012, sering ni Valte.

Napamatud-an han GDP figure an ginlalaoman han Pangulo ngan han iya economic team, sering niya. An GDP growth para han siyahan nga tulo ka bulan hini nga tuig en pinakahitaas nga nakab-ot dida hin tuig nga waray eleksyon tikang han 2006; ika-duha nga pinakahitaas ha Asya; ngan pinakahitaas nga growth rate ha bug-os nga rehiyon han ASEAN para han nasabi nga panahon, sering ni Valte.

Kompiyansa an Malacañang nga an positibo nga direksyon han aton GDP, nga nagpakita hin masbuksol ngan mas-aktibo nga gi-os pan-ekonomiya, en mahipapadayon para man han nanhibibilin pa nga mga kuwarter hini nga tuig. Dugang pa, ini nga kompirmasyon han kanan nasud dayuday nga pag-ursa en nahanabo kasunod la han pagpaangata han Moody’s Investors Service han aton credit outlook ngadto hin positibo tikang hin ka-estable. Ini ngatanan en tungod han padayon nga kompiyansa ha Pilipinas han pankalibotan nga ekonomiya ngan sugad man tungod hin masmalamrag nga panlantaw ha sakob han nasud, sering ni Valte.

Ha pungkay hini nga mga nakab-ot, ginpatapod ni Valte nga magpapadayon an gobyerno pagsusog han ginhihingita nga mga reporma ngan an panlimbasog nga mapauruupay pa an panginabuhi han katawhan Pilipino. (Ginbinisaya ni DUM/PIA-8, Eastern Samar/PCOO)