Waray news: $200-M port facility ha Manila, gin-inaguraran han Pangulo

By Daniel U. Mausisa

Friday 29th of June 2012

MANILA, june 29 (PIA) -- Gin-inaguraran ni Pangulo Benigno S. Aquino III an bag-o pa la nga natutukod nga port facility han International Container Terminal Services, Incorporated (ICTSI) nga nahimumutang ha Manila International Container Terminal (MICT) ha Manila hadton Huebes.

Pinanngunahan han Pangulo an mga opisyal, mga empleyado ngan mga bisita han ICTSI nga pinanngungulohan han presidente hini nga hi Enrique Razon Jr., ha pagbuhos han champagne ngada han markador han pasilidad nga pormal nga nag-abre ha publiko han operasyon han Berth 6 han ICTSI.

Gintukod ha kantidad nga $200 milyon, nadugangan han Berth 6 hin 300 metros nga kahiluagon an pantalan ngan hin 12 ka ektarya nga espasyo para hin container storage ngada han na-eksister nga pasilidad salit labaw pa nga hiniluag an lupgop han mga operasyon ngan mga serbisyo ha MICT nga tikang hin anay 1.9 ka milyon twenty-foot equivalent units (TEUs), usa nga basaranan hin pagsukol hin kapasidad hin transportasyon hin container, nagin 2.5 milyon na an TEUs.

Pinaagi han Berth 6, mayda na yana 1,600 metros nga espasyo nga kamamanyobrahan hin mga dumuruong nga mga barko de kargamento an MICT kon diin makakaakomodar ini hin lima ngada hin pito nga container vessels ha usa ka higayon.

Agud masmagin epektibo pa an manipulasyon han mga containers, gindugangan an mga kagamitan ha MICT kon diin mayda na ini yana 12 nga quay cranes ngan 45 nga rubber tired gantries.

Kaupod han Pangulo dida han mao nga okasyon hira Manila Mayor Alfredo Lim, Transportation Secretary Manuel Roxas II ngan hi Philippine Ports Authority General Manager Juan Sta. Ana.

Nangunguna nga kompaniya an ICTSI nga maypaghidabi hiton operasyon ngan pagpapadukwag hin 23 nga marine terminals ngan mga proyekto hin pantalan dida hin 17 nga mga nasud palibot han kalibotan. (EOPT/Ginbinisaya ni DUM/RCK/PCOO-PIA8 Eastern Samar)