Waray news: Lima nga mga dati rebelde nakakarawat sin ayuda pinansyal sa ilarum san Local Social Integration Program

By Ailene N. Diaz

Saturday 21st of July 2012

CATARMAN, Northern Samar, July 21 (PIA) -- Lima nga mga dati rebelde an natagan sin ayuda pinansyal san Probinsya san Norte san Samar sa ilarum san Local Social Integration Program, san Mierkules nga adlaw, didto sa Provincial Social Welfare and Development Office.

Nasugad si Carmen Mejia san iya pahayag pag-abri san programa nga ini produkto san Local Social Integration Program nga gumawas resulta san gin-aprobaran nga Ordinansa san Sangguniang Panlalawigan kon diin gintatagan sin asistensya adton nabalik sa gobyerno nga rebelde kalakip in kantidad kon mayaun siya dara nga armas.

Ini an promero sa bug-os nga rehiyon ngani gin-paplanohan ini kopyahon sa iba nga probinsya. Sa yana, umabot nga kinse an dati nga mga rebelde an nagpahayag sin pagbalik sa sosyedad ngan komunidad para makatagamtam san programa.

Sa iya mensahe, nagpasalamat si DILG Director Valente Bajet ngada san mga nagbalik-loob san ira otro pagtapod sa gobyerno sa paglaum nga magkayaun sin mamurayaw nga pamuruko.

Sugad ni Bajet, an gobyerno in naghahatag san ngatanan nga oportunidad para sira magkayaon sin maupay nga panginabuhi kaapi na an paghatag sin pinansyal ngan spiritual nga suporta.

Gintagan bug-at ni Bajet an dako nga bulig san singbahan pinaagi san Social Action ngan Pastoral Director san Dioseses paghatag panahon nga mahibalik an paglaum ngan pagtoo sadton mga nahibulag ngan nawarayan paglaum.

Nagpasalamat liwat si Bajet san nasyunal ngan local nga pangobyernohan sugad man san mga stakeholders o adton may panginlabot nga naging manilampuson an programa.

Gintagan duon naman ni Col. Mario Lacurom, an deputy commander san 803rd Brigade nga an programa in diri kalugaringon san pwersa armada, ini in paningkamot san magkadurudilain nga ahensya nasyunal ngan lokal labi na gud an gobyerno probinsyal sa pamumuno ni Gobernador Paul Daza.

Nalilipay siya sugad ni Col. Lacurom san iya pakakita ngan pakagsaksi sini nga mahinungdanon nga buruhaton, dida san pagbalik san aton kabugtoan nga nawaraan pagtapod san gobyerno pero yana ada an paglaum.(EOT/AND-PIA8, Northern Samar)