Cebuano news: DepEd-8 andam na sa K+12

By Marcelo M. Pedalino

Wednesday 6th of June 2012

MAASIN CITY, Southern Leyte, June 6 (PIA) -- Usa ka taas nga opisyal sa Department of Education (DepEd) sa Silangang Kabisay-an mipahibalo nga ang regional DepEd office nakasukad na alang sa pagpatuman sa talagsaong kabag-ohan sa educational system sa nasud, ang K to 12.

Si Dr. Rebecca Ragrag, pangu sa Policy, Planning, and Research Division (PPRD) sa DepEd-8, miluwat sa maong pahibalo diha sa Education Summit nga gihimo sa gymnasium sa barangay Panan-awan pagka Biyernes atubangan sa mga 700 ka mga magtutudlo nga naglangkob sa upat ka districts sa Maasin City Division.

Si Ragrag mihisgut sa mga nag-unang kasayuran sa maong program sa iyang PowerPoint presentation, kay niya pa siya daw sama sa salesman nga nagbaligya sa K+12.

Isip backgrounder kalabot sa pagka-umol sa K+12 sa tuig 2008, si Ragrag nagkanayon nasuta sa mga education officials nga ang curriculum nga gigamit karon alang sa basic education guot na.

Usab, napalgan nga ang Pilipinas uwahi kaysa mga silingang nasud sa Asya dili lamang sa gidagahanon sa tuig alang sa basic education kondi hasta mga learning competencies o sa mga na-antigohan.

Gumikan niini ug sa uban pang mga hinungdan, gi-design ang K to 12 para mousbaw ang batakang edukasyon sa nasud, diin dugang duha ka tuig ang gipuno sa naa na karon nga napulo ka tuig nga basic education plus pa gyod sa mandatory kindergarten sa dili mosulod sa grade one, mitumbok si Ragrag pag-ingon.

Kana karon, ang K +12 pormal na nga ipatuman karon nga school year 2012-2013 tapos ma-aprobahan sa miaging tuig ang Kindergarten law nga naglagda tanang grade one pupils, sa edad nga sayis anyos, kinahanglan moagi og kinder o ang katugbang niini sa weekend kon summer classes.

Ang school year 2012-2013 mao usab ang tuig nga sugdan ang grade 7, kon first year, padung na sa pagpuno og duha ka tuig alang sa senior high school, diin mga technical skills ug uban pang subject pang entrepreneur ang itampo.

Gipahibalo sab ni Ragrag nga ang Region 8 maoy model alang sa senior high school nga pagtuon labina sa mga lungsod sa Palo ug Merida busa walay luna gyod ang kapakyasan, niya pa, ug nga andam na ang rehiyon alang sa K to 12.

Ang Education Summit nga gi-host sa City Schools Division nagdala sa tema, “Strengthening Basic Quality Education via the K to 12,” nagkanayon si Genis Murallos, OIC-City Schools Division Superintendent kinsa, kuyog sa iyang assistant, Carmelino Bernadas, mipadayag sa mga nahimo, mga hagit nga gi-atubang sa division ug sa mga pamaagi aron mouswag pa ang performance.

Ang ubang diha mitambong mao sila si Gloria Reyes sa Southern Leyte State University (SLSU), kinsa mi-diskuter sa papel sa Commission on Higher Education diha sa K+12, Ryan Lacdao sa Technical Education and Skills Development Authority provincial office kinsa mi-detalye sa ilang kaakohan labina sa dugang duha ka tuig, ug Crispin Arong, Sr. sa Saint Joseph College, kinsa nagpadayag og suporta sa K+12 program.

Si Mayor Maloney Samaco gi-representahan ni Sanggunian Panlunsod member Antonio Cardoza, samtang si Gov. Damian Mercado gi-representahan ni Board Member Atty. Teofisto Rojas, ug ang duha pulos nagpadayag og suporta sa ngalan sa tagsa ka local government units nga ilang gi-representahan.

Si Punong Barangay Ernesto Sanico maoy mi-welcome sa mga bisita sa iyang barangay. (EOPT/Translated by mmp-PIA 8, Southern Leyte)