Cebuano news: 200 ka mga mag-uuma, mangingisda nakakuhag ayuda ubos sa AKBay program

By Marcelo M. Pedalino

Saturday 9th of June 2012

MAASIN CITY, Southern Leyte, June 9 (PIA) -- Mga 200 ka mga mag-uuma ug mga mananagat gikan sa 16 ka mga lungsod ning lalawigan naka-angkon na gyod sa dugay na nilang gipa-abot nga pasiunang puhunan alang sa ilang mga patigayong pang-agrikultura sa city gym ning dakbayan pagka Huwebes.

Ang loan assistance nga tag P 10,000 matag beneficiary nga walay interest ug collateral gipaagi sa Agrikultura: Kaagapay ng Bayang Pinoy Program (AKBay) sa Department of Agriculture (DA) uban sa pag-abag sa mga local government units ug mga agriculture and fishery councils gikan sa kaulohan hangtud na sa mga municipal levels.

Ang AKBay gipundohan sa Japanese government ilawom sa Japan Grant Assistance for the Food Security Project for underprivileged farmers, ug ang pundo gituyo aron ipahuwam sa mga mag-uuma para pamuhunan sa ilang agri-business, matud pa ni Joseph De los Santos, hepe sa Resource Management Section, National Agriculture and Fishery Council.

Gitumbok ni De los Santos nga sama sa ubang utang nga angay bayran, kini usab pagabayaran, kay ang kinaiya sa maong programa usa ka credit facility ug dili dole-out.

Subay sa AKBay program guidelines, ang salapi nga nadawat kinahanglan gastohon para sa na-aprobahan nga project proposal sulod sa lima ka adlaw gikan sa pagkadawat, alang sa mga proyekto nga baboyan, manok, mga utanon, o tilapia production, apan kasagaran sa mga patigayon mipili sa backyard piggery.

Ang turn-over sa AKBay funds gisaksihan sa walo sa 16 ka mga mayor nga mga recipient municipalities nga gi-classify gikan sa 4th ngadto sa 6th class, ang laing walo gi-representahan sa ilang mga municipal agriculture officers, agriculture technicians, ug budget officer. Walay labot sa maong programa ang siyudad sa Maasin, Sogod, ug Hinunangan.

Si Arsenio Fortin, Regional Technical Director-Operations Division sa DA regional office, mihagit sa mga beneficiaries sa paghimo og multi-cropping aron kapahimuslan ang mga kabtangan ug ma-doble o triple ang ani kon abot sa yutang gitikad. Si Fortin nag-representar kang DA 8 Regional Director Antonio Gerundio.

Si Dr. Wilfredo Madrona, Chairman sa Provincial Agricultural and Fishery Council (PAFC) maoy mihatag sa welcome talk, samtang si Marina Gador, Provincial Agriculturist ug AKBay provincial coordinator, maoy mi-introduce sa mga participants gikan sa lain-laing lungsod, kasagaran tag 12 ka recipients matag lungsod. (PIA 8, Southern Leyte)