Cebuano news: Pantawid Pamilyang Pilipino Program nakapa-enroll na og sobra sa tulo ka milyon nga mga banay, nag-ingon ang Malacanang

By Marcelo M. Pedalino

Friday 20th of July 2012

MANILA, Hulyo 20 -- Nunot sa agenda ni Presidente Aquino nga kahatagan ang mga Filipino og dalan alang sa edukasyon, panglawas, ug pagpalambo sa pamilya, ang Pantawid Pamilyang Pilipino Program (4Ps) nakapa-enroll na og kapin sa tulo ka milyon ka mga panimalay gunad sa bulan sa Mayo karong tuiga.

Namahayag si Presidential Spokesperson Edwin Lacierda diha sa press briefing sa Malacanang pagka Huwebes nga ang gobyerno kompyansa nga ka-sustenihan niini ang pagpatuman sa 4Ps ug nga kini mosangpot sa padayon nga pag-usbaw sa kalidad sa kinabuhi sa mga pobreng Filipino.

Ang Department of Social Welfare and Development (DSWD) nagtahu nga 3,015,671 na ka mga households ang na-enroll sa programa pagka Mayo 23, 2012, sumala ni Lacierda. Niya pa nga niining maong gidaghanon sa mga banay, 7,545,615 kanila mga bata edad 0-14 anyos ang nasakop sa programa.

Gipatuman ang 4Ps sa 138 ka siyudad ug 1,261 ka mga munisipyo lukop sa nasud, dugang pa ni Lacierda.

Hangtud pagka Mayo 31 karong tuiga, may total nga 1,707 ka mga beneficiaries ang gipang-hire sa Department of Public Works and Highways (DPWH), miingon si Lacierda kinutlo ang DSWD report.

Matud niya nga 390 ka mga pamilya ang nahatagan og capital seed fund isip tipik sa sustainable livelihood program nga gitawag Self-Employment Assistance – Kaunlaran (SEA-K).

Si Presidente Auino nagpabilin nga komitido sa dugang pagpalig-on niining programaha kansang tumong mao ang paghatag kagahum sa mga Filipino diha sa pagtanyag kanila og mga serbisyo, katakus, ug mga kabtangan aron maghatod kanila sa mas bentaha nga kinabuhi, ni Lacierda pa. (EOPT/Translated by mmp-PIA8, Southern Leyte)