Cebuano news: DTI mipahigayon ug food trade fair isip pagduso sa mga produktong Filipino

By Ma. Lailani P. Tupaz

Tuesday 17th of July 2012

MANILA, July 17 (PIA) -- Mipahigayon ang Department of Trade and Industry (DTI) sa nasudnong food trade fair nga gihinganlan ug “Eats More Fun in the Philippines,” didto sa Megatrade Halls 2 ug 3 sa SM Megamall aron mapakita ang nagkalain-laing produktong pagkaong Filipino gikan sa nagkalain-laing dapit sa nasud.

Ang trade fair gipahigayon gikan sa Hulyo 12 hangtod 16 aron mahatagan ug importansiya ang micro, small, and medium enterprises (MSME) development week nga nakatotok sa temang, “Pinoy SME: Business Tayo!”

Ang Republic Act 9501 o Magna Carta for MSMEs mitalaan sa matag ikaduhang semana sa buwan sa Hulyo isip MSME Week.

Mikabat sa 190 ka klase sa mga pagkaong Filipino ang gipakita sama sa mga utanon ug kape gikan sa probinsiya sa Kalinga, dugos ug suka gikan sa Benguet, bagnet ug longanisa gikan sa probinsiya sa Ilocos, organic ug unpolished rice gikan sa Nueva Ecija, mga postre ug uban pang karan-on gikan sa Pampanga ug Laguna, mga pagkaong gikan sa kamunggay nga ginama sa Batangas, pangat ug pili gikan sa Bicol, sukang pinakurat gikan sa Cebu, ug mga ilimnon gikan sa prutas nga hinimo sa Agusan del Sur.

Sa nagtikadaghang senemanang tabo sa Metro Manila, nagtikataas usab ang oportunidad sa negosyo sa pagkaon alang sa mga negosyante nga makatukod sa ilang kaugalingong negosyo. Dako usab kini nga bentahi alang sa mga negosyante sa rehiyon nga makakuha sa mga produkto sa agrikultura sama sa mga prutas ug utanon aron sila makahimo ug mga produktong pagkaon nga gipangita sa mga Filipinong mahiligon sa pagkaon sa sulod ug gawas sa nasud. (EOPT/Translated by MLT-PIA8 Biliran)