Cebuano news: DOST mipadugang sa produksyon sa dengue mosquito traps

By Ma. Lailani P. Tupaz

Friday 3rd of August 2012

QUEZON CITY, Agosto 3 (PIA) -- Nagpadayon ang Department of Science and Technology (DOST) pagpangita ug mga pamaagi nga mapauswag ang epekto sa hinimo niini nga Mosquito Ovicidal-Larvicidal (OL) trap nga giduso niini pagpagamit sa publiko.

Nakig-uban ang DOST sa Departments of Education ug Health sa pagpanghatag sa OL trap kits sa mga pampublikong tunghaan sa elementarya ug high schools sa 31 ka mga probinsiya nga giila sa DOH aron mapakubos ang insidente sa dengue.

Mipakusog pa ang DOST sa kampanya niini pagpasabot sa publiko kabahin sa OL trap ug eksaktong paggamit niini pinaagi sa pagpanghatag ug mga komiks, posters ug uban pang mga materyales.

Nakapanghatag na ang DOST ug mokabat sa tunga sa milyon nga OL trap kits ug mga brochures kung unsaon kini paggamit , sumala pa ni DOST Secretary Mario Montejo.

Nasayran na diha sa mga pagtuon nga ang mga kabataan sa eskwelahan ang madaling magka-dengue tungod kay mubo lang ang lupad sa mga Aedes nga lamok nga sa adlaw lamang mokaon ug mas moangay sa singoton nga panit, dugang pa ni Montejo.

Mipahigayon na ang DOST pinaagi sa buhatan niini sa National Capitol Region office ug seminar-trainings alang sa mga teacher-coordinators kabahin sa mga pamaagi paggamit sa OL Trap ug pagpreparar sa mga taho uban sa mga kasayoran kabahin sa dengue ug uban pang mga kalihokan sa gobyerno pagbuntog sa dengue. (EOPT/Trans. by MLT/DOST-PIA8 Biliran)