Cebuano news: DSWD migahin sa P15.75 milyones alang sa proyekto sa KALAHI-CIDSS sa Lungsod sa Panaon ug Calamba

By Rutchie C. Aguhob

Sunday 1st of July 2012

PANAON, Misamis Occidental, July 1 -- Mokabat sa 15.75 milyones ka pesos (Php15.75M) ang kantidad sa mga proyekto sa KALAHI-CIDSS kun Kabisig Laban sa Kahirapan-Community Integrated Delivery of Social Services, nga ipatuman dinhi sa Misamis Occidental, karong tuiga.

Ang 7.2 milyones ka pesos niini ang igahin alang sa Lungsod sa Panaon samtang ang 8.55 milyones ka pesos ang igahin alang sa lungsod sa Calamba.

Mao kini ang gikasabutan subay sa MOA kun memorandum of agreement sa pag lusad sa mga proyekto sa KALAHI-CIDSS niining duha ka lungsod, nga gipirmahan, bag-ohay pa lamang,

Ang pagpirma sa maong MOA gipangunahan ni Gobernador Herminia Ramiro kauban ni Atty. Araceli Solamillo, Regional Director ug Aldersey Dela Cruz, Asst. Regional Director sa DSWD kun Department of Social Welfare and Development, rehiyon 10.

Didto kini gipahigayon sa Provincial Capitol sa Oroquieta City nga gitambongan nila Mayor Miriam Paylaga sa lungsod sa Panaon ug Mayor Luisito Villanueva Jr. sa lungsod sa Calamba.

Mahinumdoman nga ang nahimong unang benepisyaryo sa KALAHI-CIDSS Project dinhi sa probinsiya niadtong nanglabay nga mga katuigan mao ang mga lungsod sa Bonifacio, Lopez Jaena ug Sinacaban.

Nasayran nga ang maong proyekto usab ang gipailalom sa gitawag nga counterparting scheme diin ang LGU kun Local Government Units nga benepisyaryo niini ang gilauman nga mobobo usab ug pondo agi’g equity o counterpart.

Ang lungsod sa Panaon ug Calamba gilauman nga mohatag sa ilang bahin nga mokabat ngadto sa dos (2) hangtud Tres Milyones (3) pesos.

Kalabot niini, tulobagon na sa DSWD Regional Office ang pag-pahigayon ug mga trainings alang niadtong mga tawo nga magdumala sa maong mga proyekto, sama sa Training on Infrastructures ug Financial Side diin tutokan ang pag-canvass, pag-andam ug mga proposal ug daghang uban pa.

Gisiguro ni DSWD Regional Director Solamillo nga ang mga nag-unang gikinahanglan sa mga barangay ang prioridad nga mabobo-an ug pundo.

sa walo ka bulan, gilauman sa DSWD-KALAHI-CIDSS nga ila nang madawat ang project proposals gikan sa mga kabarangayan gikan sa duha ka mga lungsod nga benepisyaryo niini.

Kalabot niini, gipasalamatan ni Governor Ramiro ang DSWD sa paningkamot nga subling makahimo ang KALAHI-CIDSS sa mga proyekto sa mga lungsod ug barangay sa Misamis Occidental.

Kalakip niini ang uban mga programa nga gipatuman niini dinhi sa probinsya diin ubay-ubay nga mga kabus ang naka-benepisyo, sama na lamang sa 4P’s kun Pantawid Pamilyang Pilipino Program, SEA-K Self Employment Assistance ug uban pa. (PIO/PIA-10 Mis. Occ.)