Cebuano news: Mis. Occ. disaster council nagpahigayon sa sunod-sunod nga panagtagbo aron pananagan-an ang kalamidad

By Pat Nano

Tuesday 3rd of July 2012

OROQUIETA CITY, Misamis Occidental, Hulyo 3 (PIA) -- Gihingusgan sa pangagamhanang probinsyal sa Misamis Occidental nga mapalig-on ang mga kalihukan sa PDRRMC kun Provincial Disaster Risk Reduction Management Council aron mapangandaman ang mga posibleng panghitabo karong panahon sa ting-ulan.

Kini gihimo sa PDRRMC pinaagi sa pag-pahigayon sa sunod-sunod nga panagtagbo nga gitambongan sa mga sakop sa PDRRMC gikan sa 14 ka mga lungsod ug tulo ka mga siyudad nga sakop ning probinsya, matud pa ni Gain Paul De Barras, ang Executive Officer sa PDRRMC sa Misamis Occidental.

Ubay-ubay nga mga hisgotanan ang gihatagan ug dalan sa maong panagtagbo sama sa planning, training, pondo sa programa, ug daghang uban pa.

Lakip sa gihisgotan ang pag-kolekta sa mga data ug kasayuran kabahin sa mga dapit nga peligro kun hazardous area nga gipangayo ni sa Gobernador Hermie gikan sa matag lungsod ug siyudad nga maoy basehan sa mga plano aron malikayan ang posibleng kalamidad ug kadaot nga mahitabo sa mga lugar.

Nasayran nga gipangandaman usab sa PDRRMC ang mga ipahigayong kalihokan karung bulan sa Hulyo dungan sa kasaulogan sa Disaster Consciousness and Prevention Month diin hugtanong kining gihatagan ug suporta sa Gobernador, matud pa ni De Barras.

Subay sa statistics, ang baha maoy nag-una nga kalamidad nga kanunay masinatian sa probinsya sa Misamis Occidental.

Sa nag-unang tulo ka bulan ning tuig, pipila ka mga lungsod sa probinsya ang nakasinati sa pagbaha diin ubay-ubay nga mga katawhan, umahan ug panginabuhian ang naapektohan, amtang gikonsidera nga “less hazard” mao ang linog.

Gi-awhag usab ni De Barras nga ang pag-pangandam sa posibleng kalamidad ang angay nga hisgutan sugod pa lamang sa matag panimalay. (PIO/PIA10, Mis. Occ.)