Cebuano news: Sugod Hulyo 1, dili na butangan ug expiration date ang mga gift checks/certificates/cards – DTI

By Rutchie C. Aguhob

Monday 9th of July 2012

OROQUIETA CITY, Misamis Occidental, Hulyo 9 (PIA) -- Sugod Hulyo 1 ning tuiga, ang tanang mga suppliers, issuers, distributors ug mga tig-baligya, gidid-an na sa pag isyu ug sa mga gift check/certificates/cards nga adunay expiry date, matud pa sa DTI kun Department of Trade and Industry.

Nahisubay kini sa DTI Administrative Order No. 10-04 kabahin sa “Guidelines on the Issuance, Use and Redemption of Gift Checks, Certificates or Gift Cards in accordance with Republic Act No. 7394, o gitawag nga Consumer Act of the Philippines, and for other Purposes,” matud pa ni Regional Director Linda O. Boniao sa DTI, rehiyon 10.

Ang usa ka gift check/certificate/card gi-ila nga usa ka instrumento nga i-hatag sa usa supplier ngadto sa usa ka tawo, partnership or a juridical entity agi ug bayad ug pabor aron ibaylo kun ibugti sa mga gamit o serbisyo nga kuhaon sa tawo alang niini.

Nagbaton kini sa pagsalig sa mga naghatag ngadto sa gihatagan niini, busa ang DTI mipakanaug sa sumbanan, aron dili kini maabusahan ug nga mapanalipdan ang mga konsumante ug dili mausik ang ilang salapi nga gibugti sa maong mga gift check.certificates/cards.

Mahinunduman nga ang DTI mihatag sa sumbanan nga sugod Hulyo 16, 2010, ang tanang mga gift checks/ certificates/cards kinahanglan butangan ug date sulod sa duha ka tuig, si Boniao miingon.

Apan sugod Hulyo 1, ning tuiga, tanang mga suppliers, issuers, distributors ug sellers ang gidid-an na sa pagbutang ug expiry date sa mga gift certificates/check/cards sumala sa DAO 10-04.

Hinoon kadtong mga gift certificates/checks/cards nga ipanghatag ngadto sa mga kunsomante isip awards, loyalty o promotional programs dili lakip sa maong guideline.

Samtang usab ang mga gift checks/certificates/cards nga walay expiry date mahimong magamit sa nagdala o gihatagan niini hangtud kanus-a niya kini gamiton, ingon man, kadtong mga wala magamit human milabay ang Hunyo 30, 2012, mahimo pang pailisdan human kini ma-validate pag-usab.

Usab, kadtong mga gift checks/certificates/cards nga wala pa magamit paag epekto niining maong sumbanan sa DAO 10-40, ug kadtong dunay mga expiry date nga lapas sa Hunyo 30, ning tuiga, mahimong ibalik ngadto sa naghatag o nagbaligya niini aron ilisdan ug lain, dugang ni Boniao. (EOR/RCA-PIA10, Mis. Occ.)