Cebuano news: DTI-Mis. Occ. mipahigayon sa Banana Industry Stakeholders Forum

By Rutchie C. Aguhob

Tuesday 10th of July 2012

OROQUIETA CITY, Misamis Occidental, Hulyo 10 (PIA) -- Usa ka Banana Industry Stakeholders Forum ang gipahigayon sa buhatan sa DTI kun Department of Trade and Industry sa Kamayan sa Oro, ning siyudad, bag-ohay pa lamang.

Ang maong panagtigum gihimo gumikan kay ang saging giila nga usa sa mga High Value Crops sa probinsya sa Misamis Occidental nga nasulod sa high demand o adunay dakung panginahanglan sa mga processed products.

Usa niining maong processed products mao ang banana chips nga nadala diha sa mga merkado sa bisan asang dapit sa kalibutan, matud pa ni Provincial Director Delia Ayano, sa DTI-Mis. Occ.

Katuyo-an sa nasangpit nga forum nga kahatagan sa kalamboan sa natad sa industriya sa saging, ang mga nanambong niini, sama sa pagtabang sa buhatan sa DTI sa pagpalambo sa industriya sa rubber ug sa uban pang mga HVC kun high value crops sa probinsya, dugang ni Ayano.

Usa sa gituki sa nasangpit nga panagtigom mao ang Banana Industry Cluster Action Plan nga nagtumong nga ma-tumbok ang mga proyekto ug programa nga makapalambo sa industriya sa saging ilabina gayod sa mga processed banana products nga misulod na sa international and national market.

Atol sa nasangpit nga forum, usab, gipahigayon ang election of officers alang sa Banana Industry Stakeholdres Association, sa katuyo-an nga adunay hugpong nga makatutok sa implementasyon sa mga proyekto ug programa sa maong industriya.

Lakip nga tutukan sa maong grupo mao ang mga suliran ug panginahanglanon sa mga producers ug negosyanti sa saging mapresko man o processed products na, dugang pa ni Ayano. (PIO/PIA-10, Mis. Occ.)