Cebuano news: LTO-10 mirehistro sa 62,939 ka mga sakyanang de motor gikan Enero paingon Marso, 2012

By Rutchie C. Aguhob

Friday 20th of July 2012

OROQUIETA CITY, Misamis Occidental, Hulyo 20 (PIA) -- Mokabat sa 62,939 ka mga sakyanang de motor ang narehistro sa LTO kun Land Transportation Office, rehiyon 10, gikan Enero paingon sa Marso, 2012. Mitala kini sa pag os-os ngadto sa 0.29posyento itandi sa 63,121 ka sakyanang de motor nga narehistro sa susamang panahon sa milabay nga tuig, matud pa ni Abogado Esteban Baltazar, Regional Director sa LTO-10.

Ang datus sa LTO-10 nagpakita usab nga adunay pagkunhod ngadto sa kapin 21.54posyento ang gidaghanon sa mga bag-ong sakyanan nga girehistro, gikan sa 12,539 ngadto sa 9,838.

Apan ang gipa-usab ug rehistro kun gi-renew ang rehistro misaka sa duolan 4.98posyento gikan sa kapin 50,582 ngadto sa 53,101.

Samtang ang gidaghanon sa giparehistro nga bag-ong sakyanan nga pribado mipakita usab sa pagkunhod ngadto sa duolan 21.55posyento, gikan sa kapin 12,438 ngadto sa 9,757.

Ang mga pribadong sakyanan nga nagpa renew sa ilang rehistro misaka usab sa 4.86posyento, gikan 43,991 ngadto sa 46,129.

Sa laing bahin, ang mga sakyanang de motor nga “for hire” nga gi-rehistro usab mikunhod sa 96.61posyento gikan sa 59 ngadto sa duha, lamang ka buok.

Hinoon, ang mga sakyanang “for hire” nga gipa renew and rehistro misaka ngadto sa 7.06posyento, gikan sa 6,138.

Misaka usab ang gidaghanon sa mga bag-o nga sakyanan sa gobyerno nga giparehistro sulod sa maong panahon, ngadto sa 88.10posyento, gikan sa 42 ngadto sa 79.

Apan ang mga sakyanan sa gobyerno nga gi-renew ang rehistro mikunhod sa 2.69posyento, gikan 855 ngadto sa 832.

Hinoon, ang gi-rehistro nga “tax exempt cars” nagpabilin nga duha lamang ka buok sulod sa parehong unang tulo (3) ka bulan sa parehong 2011 ug 2012. (PIA-10 Mis. Occ.)