Cebuano news: USAID Project mapatuman sa CdeO

By Elaine O. Ratunil

Wednesday 4th of July 2012

CAGAYAN DE ORO CITY, Hulyo 4 -- Gilagdaan ni Mayor Vicente “Dongkoy” Y. Emano, United States Ambassador to the Philippines Harry K. Thomas Jr. ug United States Agency for International Development (USAID) Mission Director Gloria Steele ang Memorandum of Understanding (MoU) sa pagpatuman sa Cities Development Initiative (CDI) Project dinhi sa dakbayan sa Cagayan de Oro.

Gawas sa Iloilo ug Batangas, napili ang Cagayan de Oro isip pilot city gumikan sa lig-on ug paspas nga pagtubo sa ekonomiya; gobyerno-lokal nga andam alang sa ekonomikanhong kausaban ug maayong pagdumala sa pang-gobyerno; ug adunay halapad nga human resource base.

Dakong garbo ug dungog sa dakbayan nga mapili isip pilot area sa maong proyekto, ug ako naga-panghinaut nga ang taas nga pagsalig sa USAID makatabang sa dugang paglig-on sa atong ekonomiya ug dagan sa negosyo,” pamahayag ni Mayor Emano.

Tipik sa lima-ka-tuig nga CDI project mao ang pagbubo sa USAID og mga ‘package of assistance’ sa natad sa ekonomiya, panglawas, edukasyon, enerhiya, kinaiyahan ug inprastraktura nga gilaumang makamugna og mga trabaho ug oportunidad ngadto sa mga katawhan sa dakbayan ug kasikbit nga mga dapit. (LCR/CdeOSP/PIA10)