Cebuano News: CHO gi-inspeksyon ang mga pampublikong tulunghaan sa Gensan

By Nirvana Alpha Vita G. Fruylan

Friday 8th of June 2012

GENERAL SANTOS CITY, Hunyo 8 (PIA) -- Mipahigayon ang City Health Office (CHO) ning dakbayan ug gitawag “sanitation inspection” sa mga pampublikong tulunghaan sa elementarya ug hayskol sa syudad aron segurohon ang usa ka hinlo ug luwas nga lugar alang sa mga batang magtutungha ilabi na sa kabag-ohay lamang nga pag-bukas sa klase.

Partikular nga gi-inspeksyon sa CHO ang mga banyo sa eskwelahan kung kini limpyo ug gina-mintanar maayo apil na ang mga kanal ug agihanan sa tubig-ulan kung dunay ga pondo nga tubig nga mamahimong itlogan sa mga lamok.

Gikanayon sa hepe sa CHO nga si Dr. Edgardo Sandig nga gusto lamang nilang segurohon nga limpyo ang mga kampus ug walay lamok-dengue nga hulga sa kahilwasan sa mga batang magtutungha.

Gibisita sab sa nasampit nga opisyal ang mga kantina aron sutaon ang pagtuman niini sa “sanitation requirement,” ug masayran kung duna kini ginabuhat nga mga kahiwian nga posibleng magdulot ug hulga sa kahimsog sa panglawas sa populasyon sa eskwelahan.

Gipaklaro ni Sandig nga ang mga kantina kinahanglan nga nahamutang kini layo sa mga banyo ug basurahan aron dili ma kontaminar ang mga pagkaon nga gina hatag sa mga estudyante ug mga magtutudlo.

Dugang pa niini ang mga tig-luto ug taga-hukad ug pagkaon kinahanglan sab nga dunay “health certificate” ug “sanitation permit” una sila magsugod sa ilahang trabaho.

“Kinanglan natong mopahigayon ug ing-aning klaseng inspeksyon aron malikayan ang lanag kon “food poisoning” tungod sa hugaw nga paghikay sa pagkaon,” segun pa ni Sandig.

Gibutyag sab niini nga ginadili sa CHO ang pagpamaligya ug mga pagkaon nga kulang ug walay nutrisyon sama sa “junk food” nga dunay negatibong epektong panglawas. (PGF-PIA 12, Gensan)