Cebuano news: 2 ka mag-uuma sa Tupi, SoCot nidaog sa Region 12 Gawad Saka Award

By Nirvana Alpha Vita G. Fruylan

Thursday 14th of June 2012

SYUDAD SA HENERAL SANTOS, Hunyo 14 (PIA) -- Duwa ka mag-uuma gikan sa munisipyo sa Tupi, South Cotabato ang nidaog kabag-ohay lamang sa gipahigayong Region 12 Gawad Saka Award.

Sumala pa sa taho gikan sa information center sa lokal nga panggamhanan, nadawat ni Resly M. Buca nga taga Brgy. Kalkam ang titulo isip Outstanding Corn Farmer samtang giila si Victoria A. Motril nga taga Baranggay Crossing Rubber isip Outstanding Agri-Entrepreneur (Micro Sub-Category).

Ang Gawad Saka Award usa ka matag tuig nga kalihokan sa Department of Agriculture aron ilhon ang mga mahinungdanong kontribusyon sa mga mag-uuma ug mananagat sa pagpalambo sa agrikultura ug ekonomiya sa nasud.

“Usa kini ka paagi aron ilhon ang mga gitawag “outstanding achievers” sa industriya sa agriculture ug fisheries nga naga representar sa mga nagkalain-laing hingtungdan sa komunidad,”segun pa ni DA 12 Regional Director Amalia J. Datukan.

Samtang nakadawat ug plake ug tag traynta mil pesos matag usa ang duwa ka nassampit nga mag-uuma, ug singko mil pesos sab ang nadawat sa “agricultural technician” sa mga mananaog.

Si Buca ug Motril ang mo-representa sa Rehiyon Dose sa ipahigayong “National Gawad Saka Search” karong tuig didto sa kauluhan. (PGFruylan/PIA-Gensan)