Hiligaynon News: South Cotabato ginapanan-aw ang bag-o nga negosyo sa eco-turismo pinaagi sa PPP nga paagi

By Edgar V. dela Cruz

Friday 8th of June 2012

KORONADAL CITY, Hunyo 8 (PIA) -- Ginaduso sang gobyerno probinsiya sang South Cotabato ang bag-o nga negosyo sa eco-turismo sa probinsiya pinaagi sa competitive public private partnership (PPP).

Si South Cotabato Gobernador Arthur Y. Pingoy Jr., nagsiling nga sa subong nakig-angot sila sa nagkalain-lain nga negosyante para sa pagpauswag sang mga bag-o nga ginkilala nga mga eco-turismo sa duog, ilabi na yadtong makita sa malisod nga Allah Valley watershed.

Siling pa ni Pingoy, nga ginpangabay na nila ang Allah Valley Landscape Development Alliance (AVLADA) isa ka hugpong sang nagapangapin sa palibot nga ginkaupdan sang 11 ka mga gobyerno lokal sa probinsiya sang South Cotabato kag Sultan Kudarat nga gin-agihan sang Suba Allah, nga iduso ang kaugalingon nga giho.

Pinaagi sa AVLADA, ang gobyerno probinsiya sang una pa nagbuko para sa pagpauswag sang eco-turismo nga duog sa Allah Valley watershed bilang pamaagi sa pagpangapin kag pag-atipan sa palibot nga duog.

Ang mga buluhaton nga nagasakup sa mga ara na nga negosyo sa eco-turismo sa mga banwa sang Lake Sebu, Surallah, T’boli kag Santo Niño sa South Cotabatokag Esperanza, Bagumbayan kag Isulan sa Sultan Kudarat.

Mahibaluan nga ang Canadian International Development Agency (CIDA) nakahatag na sang mga P6.3 milyon nga bulig sa AVLADA pinaagi sa ila Local Government Support Program – Local Economic Development.

Siling pa ni Pingoy nga ginagamit na nila ang ila natural nga manggad bilang nagapanguna nga kapital sa eco-turismo kag pag-andam sang salandigan para sa makakumpetensiya nga PPP sa negosyo sa eco-turismo.

Parti sang buluhaton sa pagpalapnag, ang gobyerno probinsiya sining karon lang nakig-upod sa scientific conference dire nga ginpangunahan sang Philippine Society for the Study of Nature, Inc. (PSSN).

Sa nasambit nga pagtililipon, ang PSSN nagpaguwa sang mga nadangatan sang scientific endeavor sa pag-estudyo sa palibot kag naghimo sang pagpanalawsaw, upod na ang ginhimo sa duog.

Mahibaluan nga sadto pa nakig-upod na ang gobyerno probinsiya sa PSSN sa nagkalain-lain nga pag-estudyo sa palibot para sa duog pinaagi sa AVLADA. (EBdC-PIA12)