Hiligaynon news: Mga bag-o nga kurso ginhanyag sang TESDA

By Edgar V. dela Cruz

Monday 9th of July 2012

KORONADAL City, Hulyo 9 (PIA) -- Naghimo sang mga bag-o nga kurso ang Technical Education and Skills Development Authority (TESDA), lakip na ang mga kursong magbusong sang baboy, baka kag karabaw.

Si TESDA secretary Joel Villnueva nagsiling nga ang ahensiya kaupod ang publiko kag pribado nga mga buluthoan sa subong magatanyag sang kurso sa artificial insemination (AI) sa baboy kag sa mga dalagku nga sapat pareho sang baka kag karabaw, gintagaan punto nga ini kinahanglan sang mga manog-obra nga mapadaku ang produksiyon sang mga dalagku nga sapat sa pungsod.

Ang duha ka kurso amo ang walo ka Training Regulation (TR) nga sa subong bag-o lang ginpabutyag sang TESDA.

Ang anum nga iban pa nga kurso amo ang pagproseso sang goma, pagprodukto sang goma, system formwork installation, construction lift passenger / material elevator operation, medical coding and billing kag 2D game art development.

Siling pa ni Villanueva nga amo man TESDA director General nga ang ahensiya sa subong may ara kabug-usan nga 235 nga ginpahayag nga mga TR nga puwede makab-ot sang mga bumulotho.

Hambal pa ni Villanueva nga ang TESDA pirmi nga nagahimo sang mga pagpamangkot sa natungdan nga mga sekta para hibaluon ang ila kinahanglan nga pagkasampaton. Ginakuha ang ila tanan nga patugsiling nga makabulig sa pagtukod sang amo man nga sulundan sa paghanas.

Sa ila nga nauna nga pagpamangkot, ang Pork Producers Federation nagsiling nga ang mga sampaton sa AI kinahanglan para makabulig nga mapadaku ang pagpadamo sang mga dalagku nga sapat.

Ang AI sa mga sapat isa ka pamaagi nga kon sa diin and semilya sang de kalidad nga baboy o kon baka kuhaon kag iiniksiyon sa reproductive tract sang babaye nga sapat.

Kontra sa natural nga proseso sang pagpalais, ang siyentipiko nga plano sa pagpabusong makabuhin sang gasto, kon sa diin ang sapat indi na kinahanglan isakay sa salakyan para dal-on sa iban nga duog.

Ini malikawan man, kon indi man maglapta ang mga sakit sa pagbusong. Ini nagatugot man sa paggamit sang may balda nga sapat pero may ara maayo nga lawas nga indi makahimo sang natural nga pagkasta.

Sa mga nagtapos sa iban nga kurso sang TESDA, ang AI nga technician, pagkatapos sang kurso, kinahanglan nga mag-agi sa assessment kag certification. (EBdelaCruz/PIA12)