Pangasinan News: DepEd insaklang toy National Achievement Test natan ya Marso

By April Montes

Monday 5th of March 2012

SIYUDAD NA DAGUPAN, Marso 05 (PIA) – Tinipon na Department of Education (DepEd) ed sayan siyudad iray amin a managbangat nen a-duamplon walo na Pebrero pian tongtongen so National Achievement Test (NAT).

Say National Achievement Test et tinaon ya iksamin ya iiter kada Marso ed saray eskuela ed kumatlon balitang tan kumapat na balitang na aral insan ed saray kumapat ya taon na hayskul ya manoorong ed pribado tan publikon eskuelaan diad Pilipinas.

Iter na National Education Testing and Research Center (NETRC) yan iksamin. Getma to yan sukaten so kamaongan na saray eskuela ed English, Filipino, Science tan Social Studies.

Man-iksamin iray eskuela ed kumatlon balitang na aral no a-dos na Marso. No a-otso balet na Marso iray kumapat ya balitang na aral tan iray kumapat ya taon na hayskul no kumasiyam na Marso.

Say ompaway ya resulta et mangidawat diad DepEd pian naparakep so pan-aral tan pan-asikaso da ed saray eskuela. Osaren met ya pian naantaan no makana iray eskuelaan ed pambabangat na iray kamaongan ya idadaolo na DepEd. (AMM-PIA 1 Pangasinan)