Pangasinan News: DSWD angiter na 4, 252 ya “cash cards” ed saray miembro na 4Ps

By April Montes

Monday 11th of June 2012

SIYUDAD NA DAGUPAN, Hunyo 11 (PIA) -- Angiter na apatiran libo, duan lasos limamplo tan dua (4, 252) ya “cash cards” so Department of Social Welfare and Development (DSWD) ed saray miembro na Pantawid Pamilyang Pilipino Program (4Ps) ed rehiyon uno nen imbeneg a simba.

Onong ed si Allan Lulu, information officer na 4Ps, getma to yan gaween ya magano tan maples so pangala na saray miembro ed “cash grant” da diad Landbank of the Philippines (LBP).

Ginawad labinsakey ya baley tan siyudad so pangiter na kard: Bugallon, San Fabian, San Jacinto, Sison tan siyudad na Urdaneta ed Pangasinan; Aringay, Luna, Pugo tan Sudipen ed La Union; siyudad na Laoag ed Ilocos Norte; tan Burgos ed Ilocos Sur.

Impanonot na direktor na DSWD ed Rehiyon Uno ya si Marcelo Nicomedes Castillo ed saray miembro ya asikasoen da yan kard ya rigalon nanlapud 4Ps. Onong ed sikato, osaren da ya ed pangkaabigan na saray anak da. Panilaloen to met iran ontombok ed saray kondisyon na 4Ps pian ontan et ag ira naekal ed programa.

Kaiba met ya angiter na kard so manedyer na LBP ya si Jethro Martinez. Impaliwawa to ray nepeg ya gaween tan ag gaween diad pan-osar so kard; iray kaokolan ya gaween no abalang, atakew o a-“capture” may kard; tan iner onasingger no bilang wala ray idalem lapud sayan kard.

Duan lasos nobentay nueben (299) miembro so ag naitdan ta sebel so saray “proxy” ya mangala na kard. Sarag da yan alaen balet diad banko na LBP no iner ira mangaala na “cash grant” da. (ANL/AM-PIA1 Pangasinan)