Pangasinan news: Sanlasos na ogogaw ya Pangasinense naitdan na tulong-pinansiyal

By April Montes

Friday 15th of June 2012

LINGAYEN, Pangasinan, Hunyo 15 (PIA) -– Angiter na tulong-pinansiyal so gobierno na luyag diad sanlasos ya ogogaw na Pangasinense nen kumanem na Hunyo ed Pangasinan Training and Development Center diad sayan baley.

Onong ed si Dr. Irmina Francisco, manangidaolo na Provincial Scholarship Fund Board, saraya et eskuela diad onaan ya taon ed kolehiyo ya pinmasa diad iksamin ya ginawa nen sampot na Mayo diad Pangasinan National High School ed Lingayen tan diad Juan G. Macaraeg National High School ed Binalonan.

Manonaan diad saman ya iksamin si Shaira Joyce Prado ya nanlapud barangay Poblacion ed Bugallon tan nanorong ed Pangasinan National High School.

Labinsakey ed saray iskolar so otomatikon akaiba ta sikara et nansompal ya “valedictorian” tan “salutatorian” nen hayskul. Amin ira et makaawat na walon libo kada semestre.

Nakaiba ra ed saray iskolar na luyag ya manoorong diad siyameran kampus na Pangasinan State University ya makakaawat na liman libo kada semestre. (PIA-Pangasinan)