Pangasinan news: DILG angiter na kagawaan ya pansalba no walaay kalamidad ed Pangasinan

By April Montes

Tuesday 17th of July 2012

LINGAYEN, Pangasinan, Hulyo 17 (PIA) -- Naitdan na kagawaan ya pansalba no walaay kalamidad so Provincial Disaster Risk Reduction and Management Council (PDRRMC) ya nanlapud Department of Interior and Local Government (DILG) nen a-nuwebe na Hulyo diad Kapitolyo ed sayan baley.

Onong ed si Vice Governor Jose Ferdinand Calimlim Jr., sarayan naawat da et makaarom diad serbisyon-pansuporta ya oosaren no walaay kalamidad. Panilaloen to met iray totoo ya man-alwar tan amtaen ya lanang so panaon pian nasegurado so pangkaabigan da.

Inter na DILG so kuarenta ya “safety vest,” sampluran silew, waloran radyo ya walaay baterya tan antena to, limaran pala, apatiran “megaphone,” taloran “stretcher,” taloran piko, duaran “chainsaw,” duaran “machete,” duaran genereytor tan duaran tolda.

Diad saya, naipanengneng na DILG so suporta to ed lokal ya gobierno na luyag pian naikorang da so panpaabeba na risgo no walaay kalamidad. Napaatagey to met ya so pamparaan da parad kalamidad tan naapiger da so panresponde ed siopaman ya wadiad peligro. (PIA-Pangasinan)