Maguindanao news: SPED Center kanu N. Cotabato ininggayan nu DepEd sa accreditation

By Herohito M. Yoshioka

Wednesday 4th of July 2012

KORONADAL CITY, South Cotabato, July 4 (PIA) -- Mapasad kanu walo a lagun kanu kapadsikap, ininggayan den kanu kabpakilala nu Department of Education ataw ka DepEd accreditation su Special Education (SPED) Center nu Lanao Central Elementary School (LCES) a sa Barangay Lanao, Kidapawan City, North Cotabato.

Kaped kanu siya, inidsukol-sukol ni Special Teacher 1 Maria Dencie Pineda kanu kinatalima nu SPED Center sa kinapamahahila nin.

Tigin ni Pineda, su accreditation nu DepEd sa kanilan a pasilidad na importante a banal sapab sa isa a nanguka a pintu kanu ngin a biyaya a mapakay minggay sa kanilan sabap sa dala gayd sapat a pondo kanu center a para sa mga nisisita a mana su mga pambabasen endo kaped pen a mga gamit kanu kabpamandu a para sa mga pamamangagi kanu silan a mga ‘special children’.

Pidtelu nin pen, minumbal silan sa vegetable garden andu makauman kanu kadtabang kanu mga kapadtrining ataw ka kabpagalaga sa mga wata a mga sadel.

Kanu kabpakatadem, su minukit a Mayo kanu niya a lagun, nangumbal su Notre Dame of Kidapawan College (NDKC) High School Class 1979 sa Concert for a Cause kanu endaw e kanilan a natimu na ininggay sa SPED center nu LCES.

Kanu ulian nu tudtulan, su SPED Center na isa a institusyun a padtiyakap o pamandu sa mga wata a cerebral palsy, down syndrome, hearing impairment, low vision, autism, learning disabilities ataw ka kaped pen a personality disorders ataw ka niya lon kabanal na aden kapansanan nin. (HMY-PIA 12)