Hiligaynon news: Kalimpyo kag seguridad para sa banwa sang Makilala ginaduso sang Public Safety Division

KORONADAL CITY, Hunyo 8 (PIA) -– Nagbuliganay ang mga pumuluyo kag iban nga sekta sa banwa sang Makilala sa pagduso sang kalimpyo kag seguridad sang banwa.

Nangin maayo kuno ang resulta sang pagpanguna sang mga empleyado sang lokal nga panggamhanan sang Makilala sa pagpaninlo sang mga kalsada, pagkuha sang mga bato, mga plastic kag iban pa nga mga basura nga nagaralapta.

Suno kay Public Safety Division consultant Odin Deseo, pursigido gid si Mayor Rudy Caoagdan nga ipatuman ang mga programa nga makahatag sang husto nga seguridad kag kalimpyo sa bug-os nga banwa

Hugot sini, suno pa, nga ginabantayan ang pagpatuman sang iban pa nga lokal nga ordinansa kasubong sang Ordinance No. 22-98 o kon ang laye batok sa panigarilyo sa mga pampubliko nga lugar kag ang Anti-Loitering Act o kon ang pagdili sa pagpanglapta kag pagpanghaboy sang basura sa mga lugar nga hindi dapat habuyan.

Ang adlaw sang sang Biyernes ang ginpili ni Mayor Caoagdan nga maninlo ang mga empleyado sang lokal nga gobyerno sa mga nagapanguna nga kalsada sang banwa agod mangin hilway ang pagbiyahe sang mga motorista nga nagaagi diri, dugang pa ni Deseo.

Samtang, kaupod man sa hugot nga ginabantayan amo ang pagpatuman sa mga ordinansa sang Public Safety Division nahanungod sa Republic Act 4136 o kon ang paggamit sang helmet sang mga motorista nga naga-agi sa Makilala Highway kag ang padayon nga pag-usisa sang mga Internet Café base sa Ordinance No. 179-2008, suno kay Deseo. (RTL-PIA12)

Number of Comments: 0

  

  

• Notices
• PCDSPO
• Speeches

News from the Regions

PIA eMagazines