Ilocano news: Mayor ti Solano, NV, nangikari ti gunguna kontra kadagiti maiparit a droga

By Benjamin Moses M. Ebreo

Friday 27th of July 2012

SOLANO, Nueva Vizcaya, July 27 (PIA) -- Inkari ni mayor Philip Dacayo iti daytoy nga ili a mangted ti gunguna a kwarta kadagiti makaitudo nga umili agraman makaaresto nga pulis kadagiti maatap nga agus-usar ken aglaklako kadagiti maiparit a droga ti daytoy nga ili kas iti marijuana ken shabu.

Dayoty ti imbatad a sao ti mayor itay kallabes laeng gapu iti agraraira nga kaso ken insidente maipanggep ti panaglako ken panagusar iti maiparit a droga kadagiti agtutubo ken bumaro nga umili.

Sigun kenni Dacayo, mangted isuna ti P80,000.00 kas kangatwan a gated tapno agbalin a gunguna dagiti tumulong a mangeddep iti panaglako ken panagusar kadagiti illegal drugs ditoy a munisipyo.

“Nakababainen ti mangmangegtayo nga damag kadagiti pagiwarnak ken radio maipanggep kadagiti ubbing ken gagayyemtayo nga matiltiliw gapu iti panaglako wenno panagusar kadagiti illegal a droga,” kinuna ni Dacayo.

Ti nasao nga gated a gunguna ket maited met kadagiti pulis nu matiliw da dagiti maatap ng drug pushers wenno users.

Sigunpay kenni Dacayo, naskenen nga tumulong dagiti umili tapno mapasardeng iti gararaira nga panaglako ken panagusar kadagiti illegal a droga ti ili a Solano.

Kinunapay ni Dacayo nga saanna a kaluban ken paboran dagiti empleyado iti munisipyo, agraman dagiti kabagyanda nu maipanggep ti kaso nga illegal droga ti pagtungtungan.

Sigun kenkuana, masapul nga agbalin a pagwadan dagiti empleyado ken offisyales ti local government unit tapno tuladen dagiti umili iti nasayaat nga ar-aramidenda.

Pinalagipan laeng ti Dacayo dagiti otoridad nga tungpalenda iti rumbeng a pagalagadan ti linteg tapno saan a maaramid dagiti insidente a mangpukaw iti kalintegan dagiti umili. (BME/PIA 2-Nueva Vizcaya)