Hiligaynon news: Gobyerno nagpaseguro sang maayo nga polisia sa pagmina suno sa 1987 Constitution

By Atty. Ma. Janet C. Mesa

Thursday 5th of July 2012

MANILA, Hulyo 5 (PIA) -- Ang administrasyon Aquino nagpaseguro nga ini magadihon sang maayo nga polisia sa pagmina kasunod sa 1987 Constitution, suno sa isa ka opisyal sang Palasyo.

Si Presidential Spokesperson Edwin Lacierda naghimo sini nga pahayag sa isa ka regular nga press briefing sa Malacanang kasunod sa mga balita nga may iban nga mga gobernador kag mga stakeholders nga nagaplano sa pagpamatuk sa bag-o nga polisia sa pagmina sang administrasyon Aquino sa pagpasaka sang kaso sa Supreme Court kung ini mapirmahan na.

Nagsiling si Lacierda nga indi nila mapangunahan ang mga tawo batok sa pagpasaka sang kaso. Ang importante suno kay Lacierda amo nga mapaseguro nga ang Executive Order (EO) sa pagmina sarang makatindog sa pag-usisa suno sa konstitusyon

Si Lacierda nagnotar man nga sa subong ang administrasyon nagapatigayon sang malapad nga konsultasyon sa mga stakeholders sa pamina bag-o tapuson ang ginaproponir nga EO.

Sa subong suno kay Lacierda wala pa ang pinal nga EO apang ini gina diskusyonan na. Igapagwa na ini sa madali nga panahon, kag sa subong ang bag-o nga polisia sa pagmina gina “fine-tuning” pa sa mga iban nga probisyon.

Ang gobyerno nagaduso sang pagpaninguha sa paghimo sang bag-o nga polisia sa pagmina nga maka benepisyo sa gobyerno kag sa mga nagapahunan sa pagmina.

Ang Chamber of Mines sang Pilipinas nagsiling nga ang industriya sa pagmina nadula-an sang daku nga pahunan sa pagmina sang isa ka tuig bangud wala sang bag-o nga polisia sa pungsod.

Sa pahimo sang bag-o nga polisia sa pagmina, ang administrasyon Aquino nagapa-abot nga ang bag-o nga tikang makakuha sang mas madamu nga kita para sa gobyerno sa tunga sang mataas nga pagkinahanglan sang mga metal nga manggad sang pungsod. Ini nga bag-o nga EO nagatuyo sa pagbalanse sang mga ginakabalak-an sa pagproteksyon sang palibot kag sang kita para sa ekonomiya. (js/JCM-PIA6)