Hiligaynon news: Gobyerno ginahimo ang tanan agud mapagua ang tanan nga mga Pilipino sa Syria

By Atty. Ma. Janet C. Mesa

Tuesday 17th of July 2012

MANILA, Hulyo 17 (PIA) -- Ang administsrasyon Aquino nagdugang sang iya pagpaniguha agud makit-an ang tanan nga mga Pilipino sa nagaginamo nga Syria kasunod sa mandatory nga programa sa pagpagua sang mga Pilipino sa lugar.

Si Presidential Spokesperson Edwin Laciarda nagpahayag sa regular nga press briefing sa Malacanang sang Lunes nga ang crisis alert level sa Syria nagapabilin sa numero 4, nga buot silingon mandatory nga pagpauli sang tanan nga mga Pilipino ang ginapatigayon.

Ang iban sang aton mga Pilipino nakapangasawa ukon nakapamana na sang mga taga-Syria kag padayon nga ipapauli-on sila. Apang medyo mabudlay na kung may pamilya na sila suno kay Lacierda.

Ang mga balita nagasiling nga ang gobyerno nagahimo sa tanan agud mapadasig ang pagpagua sang mga Pilipino sa magamo nga pungsod. Apang ang operasyon nabudlayan bangud sa pagpamalibad sang iban nga Pilipino sa paghalin sa Syria.

Si Lacierda nagsiling nga ang pinaka-ulihi nga mga Pilipino nga napabalik nag-abot sang isa ka semana kag ini sila mga 17.

Sang Hulyo 12, may kabilugan na sang 1,775 ka mga Pilipino ang napapauli halin nagsugod ang gobyerno sang mandatory nga programa sa pagpauli sang mga Pilipino sang Disyembre 2011 sa magamo nga krisis sa Syria.

Ang Department of Foreign Affairs (DFA) nagahingyo sa mga pamilya sang mga Pilipino sa Syria sa paghatag sa Office of the Undersecretary for Migrant Workers’ Affairs sang pinaka-ulihi nga impormasyon kung sa diin subong ang ila mga pamilya kag kung sa diin sila mapakig-angotan sa Syria sa pagtawag sa (02) 834-4996 or (02) 834-3333. (JCM/JS/PCOO-PIA6)