Hiligaynon news: Bacolod BPO/ICT una nga nag-adoptar sang VCGP sa KN

By Jaime S. Cabag, Jr.

Thursday 7th of June 2012

MANILA, June 7 (PIA) -- Ang mga katapu sang Bacolod City Industry Tripartite Council para sa Business Process Outsourcing/Information and Communication Technology (BPO/ICT) ang labing una nga katapu sang industriya sa ICT sa Kabisayaan Nakatundan kag ika-35 sa bug-os nga pungsod nga nag-adoptar sang Voluntary Code of Good Practices (VCGP).

Mismo si Secretary Rosalinda Dimapilis-Baldoz sang Department of Labor and Employment (DOLE) ang nagpahayag sang nasambit nga balita, pagkatapos nga iya ginsaksihan ang paglagda sang nasambit nga Code kag sang iay man pag-inagurar sang Sugar Workers Development Center sa Bacolod sini lang.

Ang Code ang gindihon sang pagbuyloganay kag pagsinapulay sang mga hubon sang mga tag-iya sang kompaniya kag empleado sa indutriya kaupod ang sector sang gobyerno.

Gintudlo ni Baldoz nga ang nagapanguna nga mga tinutuyo sang pag-angkon sang isa ka Code amo ang pagpatigayon sang maayo nga relasyon sa tunga sang mga tag-iay kag empleado kag pagpasanyog sang boluntaryo nga pagsunod sang ginatawag “labor and occupational safety and health standards” , kon sa diin ini ang ginalauman nga dugang nga magatib-ong sang padayon nga pag-uswag kag pagbaskug sang industriya sa BPO/ICT sa tunga sang pangkalibutanon nga mga pagpanghangkat.

Gindugang sang tiglikum nga ang Code ang magapasanyog man sang igkasarang sang mga gusto magtrabaho sa industry, kon sa diin ini ang nagapangatubang subong sang kakulang sang kwalipikado nga mga manog-obra.

Sa iya nga bahin, ginsiling ni DOLE6 Regional Director Ponciano M. Ligutom nga partikular nga ang Code ang nagasaad sang mga tinutuyo sang mga katapu sang mga grupo sang Bacolod City BPO/ICT nga magtukod sang boluntaryo nga mga talaksan kag istandard para sa sosyal kag pagpang-empleo nga mga aspeto sang industriya sa BPO/ICT sa rehiyon.

Nagtambong man sa paglagdaanay sang Code si Mananabang Jocelle Batapa-Sigue, nga pinuno sang Information and Communication Technology Association of the Philippines, sa tuyo nga ipakita ang iya suporta sa Code. (DOLE/JSC/JCM/PIA6)