Hiligaynon news: BIR-RR11 nakakolekta sang mas mataas nga buhis

By Jaime S. Cabag, Jr.

Thursday 21st of June 2012

SYUDAD SANG ILOILO, June 21 (PIA) -- Nakakolekta ang Bureau of Internal Revenue (BIR) Revenue Region No. 11 sang buhis nga naglab-ot sa kantidad nga P2.689 bilyones sa sulod sang una nga lima ka bulan halin Enero tubtub Mayo sini nga tuig.

Suno sa hepe sang BIR RR-11 Taxpayers Assistance Unit (TAU) nga si Ma. Luchi Contreras-Ong, nga nagaserbe man bilang Public Information Officer sang nasambit nga talatapan, ang ila koleksyon ang mas mataas sang 25.30 porsyento ukon P542.885 milyones sang sa P2.146 bilyones nga ila natipon sa sulod sang katulad nga binulan sang tuig 2011.

Ginsiling man ni Contreras-Ong nga ang nasambit nga koleksyon ang nakalampas man sa ila dapat nga kolektahon para sa Enero – Mayo 2012 nga P2.612 bilyones sang 2.92 porsyento ukon P76.203 milyones.

Ginpabangod sang BIR-RR11 nga ginapamunuan ni Regional Director Romulo L. Aguila, Jr. ang mas mataas nga koleksyon sa mas mabaskug nga pagpatuman nila sang mga kampanya kalakip ang “Oplan Kandado” kag Run After Tax Evaders (RATE) kag subong man sa mas mataas nga lebel sang ihibalo sang publiko tuhoy sa sini nga mga kampanya kag sa importansya sang buhis para sa pagsanyog sang pungsod.

Ginpahayag ni Contreras-Ong nga magapadayon sila sa paglagas sang yadtong nagapalagyo sa ila obligasyon sa pagbayad sang buhis nga dapat magkadto sa gobyerno.

May yara man sila nga programa nga ginapatuman nga ginatawag “Premyo sa Resibo” nga kabahin man sang ila mga paghimud-os nga mapasanyog ang koleksyon sa buhis.

Ang pagpasanyog sang koleksyon sang buhis ang isa sa mga mayor nga programa sang gobyerno sa idalum sang administrasyon ni Pangulong Aquino padulong sa mauswagon nga ekonomiya.

Ang BIR-RR11 ang nagasakup sang Revenue District Offices sang Kalibo, Aklan (RDO 71), Roxas City, Capiz (RDO 72), San Joase, Antique (RDO 73), Iloilo City (RDO 74), kag Zarraga, Iloilo (RDO 75). (JCM/JSC/PIA6)