Hiligaynon news: Programa sa ‘Investment Convergence’ ginkasugtan sang PHL kag UNICEF

By Jaime S. Cabag, Jr.

Wednesday 11th of July 2012

MANILA, July 11 (PIA) -- Naglagda sang isa ka memorandum of understanding (MOU) ang gobyerno sang Pilipinas kag United Nations Children’s Fund (UNICEF) kaangot sa pagpatuman sang isa ka buyluganay nga programa sa kooperasyon ukon “joint programme of cooperation” tuhoy sa “Investment Convergence for Equity for Children”.

Ginsiling ni National Economic and Development Authority (NEDA) Secretary Arsenio M. Balisacan nga sa idalum sang programa ang gobyerno nasyonal kag UNICEF ang magahatag sang bulig teknikal sa mga kumonidad kon sa diin igapahamtang ang nasambit nga programa sugod karon nga tuig tubtub 2016.

Ini sa tuyo nga mapadali ang paglab-ot sang sini nga mga duog sang Millennium Development Goals (MDGs), partikularmente sa pagpabaskug sang mga polisiya kag pagpatuman sang mga serbisyo sosyal para sa mga kabataan.

Ang programa ang inisyal nga pagapatigayunon sa 30 ka mga banwa kag 6 ka mga syudad nga nagalakip sang mga masunod: mga banwa sang Basud, Capalonga, Labo, Mercedes, Paracale kag Vinzons sa Camarines Norte; Milagros, Cawayan, Monreal kag Aroroy sa Masbate; Mapanas kag Bobon sa Northern Samar; Leon B. Postigo, Tampilisan, Siayan kag Sindangan sa Zamboanga del Norte; Midsayap, President Roxas, Aleosan kag Arakan sa North Cotabato; Malungon sa Saranggani; Kalamansig kag Lebak sa Sultan Kudarat; Parang, Upi, South Upi kag Mamasapano sa Maguindanao; Parang kag Siasi sa Sulu; kag Languyan sa Tawi-Tawi.

Ang anum ka mga syudad nga nasakupan amo ang Puerto Princesa City, Zamboanga City, Davao City, Cotabato City, Pasay City, kag Quezon City.

Ang isa sang mga gin panaad sang mga pamunuan sang sini nga mga kumonidad amo ang pagdihon sang isa ka “technical assistance plan” nga nagapadasig sang paglab-ot sang MDGs para sa 2012 tubtub 2013 santo sa ila mga “comprehensive development and land use plans” kalakip ang mga plano sa pagpanubo sang kaimulon.

Ginpahayag ni Balisacan nga ang nasambit nga program a ng ginasuporta sang gobyerno nasyonal bangod ini ang nagasanto sa tinutuyo sang gobyerno para sa mga kabataan nga nadihon sa Philippine Development Plan 2011-2016.

Ang mga nagpirma sa MOU ang ginalakipan sang NEDA, Department of the Interior and Local Government kag natungdan nga mga gobyerno local para sa Pilipinas kag sang UNICEF paagi sa ila tiglawas sa pungsod nga si Tomoo Hozumi. (NEDA/JCM/JSC-PIA6)