Hiligaynon news: Alkalde sang Syudad ginpabutyag kapuslanan sang kahilwayan

Friday 15th of June 2012

SYUDAD SANG ILOILO, June 15 (PIA) -- Gintagaan sang igtalupangod ni Mayor Jed Patrick Mabilog nga mapabutyag ang daku nga kapuslanan sang pagluntad sang kahilwayan para sa isa ka lugar sang siya ang magpamulongpulong sa ika 114 ka anyos nga anibersaryo sang Philippine Independence Day sa seremonya nga ginhiwat sa Plaza Libertad, sini nga syudad.

“Madamo nga kabuhi ang nadula sa malawig kag maduguon nga pagpakig-away para sa kahilwayan,” hambal ni Mayor Mabilog sa atubang sang mga nanuhaytuhay nga sektor nga nagtambong sa seremonya nga ginhiwat para sa pagdumdum sang mga pagpakig-away sang mga Pilipino nga mga baganihan para mapaluntad ang kahilwayan para sa pungsod.

Ginsiling ni Mayor Mabilog nga sa pagsaulog sang Philippine Independence, dapat aton selebrahon ang mga paghimakas sa pagpamatuk batok sa mga pagpanglupig.

Ang Hunyo 12 nagadumdum sang deklarasyon sang paghilway sang Pilipinas gikan sa pangginahom sang Espana sadtong Hunyo 12, 1898.

Sa nabalhag sa estorya sang pungsod, madamo nga mga pagribuk ukon kinagubot ang nagluntad sa madamo nga bahin sang pungsod batok sa pangginahom sang mga Espanol, apang nagluntad sa Hunyo 12, 1898 nga ang watawat sang Pilipinas nahauna nga ginwagayway kag ginkanta ang pungsudnon nga ambahanon sa balkonahe sang balay General Emilio F. Aguinaldo sa Kawit, Cavite.

Ang Alkalde sang Syudad nagsiling nga ang nangin tema sang 114th Philippine Independence day celebration amo ang “ Kalayaan: Pananagutan ng Bayan Para sa Tuwid Na Daan” nga suno sa iya nagpadangat sang mensahe nga paglaum kag pasalig sa maayo nga palaabuton para sa mga Filipinos.

Ang tema nagahambal sa aton nga kita maghaylo sang aton kaugalian para sa maayo nga pagbag-o kag ikasangkol, hambal ni Mabilog samtang iya gindugang sa pagsiling nga “ang yara sa gobyerno dapat sila mangin accountable sa mga tao, kag para naman sa mga tao nga magmangin katuwang sang gobyerno para sa mga pagpaninguha para sa pagpaayo sang kalidad sang kabuhi ang tao”.

“Ang Independence Day indi lamang nagakahulugan nga hilway gikan sa pagginahom sang dumuluong, kundi nga ini ang talaagyan sang pagtuman sang aton mga obligasyon kag responsibilidad bilang mga lideres, bilang suluguon ang banwa kag ordinary nga mga pumuluyo, agod nga ang seguridad kag kasulhayan sang tagsatagsa magarantiyahan sa tagsa ka bayhon sang aton kasanyugan,” hambal ni Mabilog.

Ang kahiwatan gintagaan sang duag sang pagpalupad sang mga balloons sa panghinakup nga bahin ang programa.(JSC/VWV-PIA 6 Iloilo)