Aklanon News: Mayor it Kalibo, nagpanawagan nga edukahon ro mga inunga sa historia it nasyon

By Venus G. Villanueva

Thursday 14th of June 2012

KALIBO, Aklan, Hunyo 14 (PIA6) -- Nagpanawagan kurundaya eamang si Mayor William Lachica it Kalibo sa mga ginikanan ag mga maestro nga edukahon ro mga unga nahanungod sa historya it Pilipinas.

Ginpaabot ni Lachica rayang panawagan sa anang pagpamuno sa pag komemorar it ika 114 nga Independensya it Pilipinas nga ginhiwat sa Pastrana Park sa Kalibo kaibahan ro mga iba pang opisyales it banwa, mga empleyado ag mga opisyales ag maestro/maestro it Department of Education (DepEd).

Sa anang mensahe, ginhambae ni Lachica nga utang it mga Filipino ro kahilwayan sa mga baganihan ku tiyempo it Espanyol, ikaywang giyera pangkalibutan, Rebolusyon sa EDSA ag sa makaron nga mga pulis ag mga suldado nga padayon sa pagpangapin sa atong kahilwayan.

Ginhambae man ni Lachica nga kon amat hay halilipatan ro atong historya kapin gid ro mga sakripisyo it atong mga baganihan bangud sa kasakuon sa trabaho ag sa iba pang mga hilimuon it kada isaea.

Nagpaabot man imaw it kalipay nga sa pihak kara, nagatinguha ro gobyerno nga magtao it importansya sa selebrasyon ag raya hay paagi sa pagpartisipar it mga maestro ag maestro paagi sa Teachers Arts Guild it Kalibo Pilot Elementary School (KPES) nga nagtao it mayad-ayad nga interprestasyon sa historya it kahilwayan it Pilipinas paagi sa mga kanta ag saot.

Ginsaysay man it grupo it mga manugturo ro historya it bandera it Pilipinas hasta sa makaron nga itsura it ginagamit sa nasyon.

Sa nasambit man nga okasyon nga ginpakigsakupan man it mga elemento it Philippine National Police, Philippine Army, Bureau of Fire Protection ag Philippine Coast Guard, nagpanawagan man si Lachica sa pag-ugyon o pagbilog it tanan nga mga Filipino sa pagpangatubang sa mga problema nga naga abot sa nasyon.

Suno kana, base sa tema nga “Kalayaan: Pananagutan ng Bayan Para Sa Tuwid na Daan”, responsibilidad it kada isaea nga siguraduhon ro malimpyo nga pag ginobyerno, nga nakasentro sa pagtao it mayad nga serbisyo sa mga pumueuyo ag sa padayon nga pagtikang sa tadlong nga daean. (JSC/VGV-PIA 6 Aklan)