Kinaray-a news: Benepisyaryo kang Pantawid Pamilya magabaton kang andang sustento kadya nga bulan

By Pilar S. Mabaquiao

Wednesday 20th of June 2012

SAN JOSE, Antique, June 20 (PIA) -- Ang mga benepisyaryo kang programa nga Pantawid Pamilyang Pilipino Program natalana nga magabaton kang ika-tatlo nga sustento sa kadya nga bulan kang Hunyo.

Suno kay Jeffrey Gabucay, Provincial Coordinator kang Pantawid Pamilya, ang pagpanagtag kang amo nga sustento ginahimo kang Department of Social Welfare and Development kisra sa darwa ka bulan.

Sa Antique may 20,097 ka mga pamilya ang natalana nga magabaton kang sustento. Ang kada pamilya mahimo makabaton kang P1,400 sa kada bulan depende sa karaku-on kang anang bata nga naga eskwela.

Ang 16 ka mga banwa may ana run nga ti-un kun san-o dya igapanagtag sa mga miembro. Ang mga banwa kang Hamtic, Anini-y, Tobias Fornier, Culasi, Laua-an, Libertad, Patnongon, San Remigio, Sebaste, Sibalom, Pandan, Tibiao kag Valderrama magabaton kang kwarta paagi sa personal nga pagta-o kang mga natungdan nga ahensya.

Samtang ang mga banwa kang Bugasong kag Barbaza magabaton kang andan sustento paagi sa card kag ang banwa kang Caluya magabaton kang andang kwarta paagi sa GCash.

Ginapangabay gid ni Gabucay ang mga ginikanan nga benepisyaryo ka dyang programa sa paghimo kang tanan nanda nga masarangan para mabuligan ang andang pamilya nga makatibawas sa kaimulon kag makakita kang tayuyon nga parangitan-an. (JSC/MLG/PSM-PIA6 Antique)