Ilocano News: Panagbisikleta dagiti pulis ti Nueva Vizcaya, iwayat ti baro nga pangulwen ti PNP

By Benjamin Moses M. Ebreo

Sunday 22nd of April 2012

BAYOMBONG, Nueva Vizcaya, Abril 22 (PIA) -- Iwayat ti Philippine National Police(PNP) ditoy nga probinsia ti panagbisikleta dagiti pulis kabayatan ti panagpatrolyada kadagiti barangay.

Daytoy nga gakad ti maysa kadagiti aramiden a programa ni Police Senior Supt. Valfrie Tabian, pangulwen ti PNP ditoy tapno malappedan panagraira dagiti panagtakaw, panaghold-up ken daddumapay a krimen.

Sigun ti hepe ti PNP, epektibo daytoy nga programa gapu ta makadalan ti pulis nga nakabisikleta uray akikid ti pagtarayan dagiti managdakdakes.

Babaen iti daytoy nga programa, mas makatiped pay ti gasoline ti ahensia ken PNP ken agbalin pay a nasalun-at dagiti pulis gapu ti ehersisyo nga aramidenda.

Dakkel ti panagyaman ni Tabian gapu ta immannubot dagiti mayor ti naduma-duma nga ili ti nasao nga programa ket kayat da a mangted kadagiti bisikleta nga usaren dagiti pulis.

Nu maiwayat ti nasao nga programa, dakkel ti maitulong dayoty tapno maibaba ti bilang dagiti panagtakaw, hold-up ken panagpapatay dagiti managdakdakes ditoy a probinsia.

Inpaganertget pay ni Tabian nga ti suporta ken panagsipot dagiti umili ti kangrunaan nga armas tapno malappedan dagiti lrimen a mabalin nga mapasamak kadagiti pagtaenganda. (TCB/BME-PIA 2, Nueva Vizcaya)